PAN leh Aadhaar thlunzawm lote Rs. 10,000 chawitir theih an ni

Permanent Account Number (PAN) card nei­ten March 31 hmaa an Aadhaar card nena an thlunzawm loh chuan Rs 10,000 an chawi theih dawn thu income tax department chuan a tarlang.

Income tax dept hian Aadhaar card nena PAN card thlunzawm lote PAN card hi March 31 hnu lamah chuan inoperative (thawk lo) tiin a puang a ni. Hei vang hian PAN card neituten tun thla chhunga Aadhaar card nena an thlunzawm hman loh chuan Income Tax Act hnuaia Section 272B hmangin pawisa Rs. 10,000 an chawi tir thei tawh dawn a ni.

Chhiah pekna emaw chhiah khaihhnawiha PAN card hmang lem lo, ID proof atan te, bank account hawn nan emaw driving licence dilna atan emawa hmang, Aadhaar card nen thlunzawm kher lote chu pawisa chawitir tur hian a huam lo thung. 

PAN card hmanga Bank-a account hawng, mahse an PAN card chu Aadhaar card nena thlunzawm lote hi, Bank-a an pawisa an dahluh leh lakchhuah Rs. 50,000 chin chung lamah chuan an PAN card hian Aadhaar a thlunzawm a ngai tawh bawk ang.

Ramchhunga PAN card inoperative (thawk lo) neite hian a hranpaa PAN card thar siam a ngai tawh lo a, tun thla chunga Aadhaar nena thlunzawm mai kha a tawk a ni. Thlunzawm a nih velah Aadhaar nena thlunzawm lote PAN card chu operative (thawk) a lo ni tawh ang. Tun thla chhunga tifel hmante chu engmah pawisa chawi an ngai dawn lo bawk.