John Schlitt-a'n album thar 'GO' a tlangzarh
Petra frontman John Schlitt chuan Zirtawpni liam ta khan a solo album parukna 'GO' a tlangzarh.
Grammy leh Dove Award pawh dawng tawhtu, GMA Hall of Famer John Schlitt hi a reh rei tawh hle a, kum 2013-a The Christmas Project a tlangzarh hnua album a tihchhuah leh hmasak ber a ni. 'GO'-ah hian hla 11 a awm a, iTunes, Amazon leh streaming service hrang hrangah leia ngaihthlak theih a ni a, spotify-ah pawh dahchhuah a ni tawh.
Petra fan-te tan chuan John Schlitt-a album thar hi hmaih phal chi a ni lo a, kum 70 lai ni tawh mah se a zaithiam dan a la pangngai reng a, Kristian rock hla ṭha tak tak a rawn chhawp chhuak leh ta a ni. 4K recording label nen kum tam tak thawk dun tawh mah se 'GO'-ah erawh hi chu Girder recording label a thawhpui thung. 'GO' a hla ṭhenkhat hi chu rock n roll lam hawi a ni a, kum upa lam tan pawh tuipui theih viau tur a ni hlawm. Amaherawhchu techno vibe lamte pawh a tel nawk a, tunlai music leh rock n roll-te a inpawlh chho nawk a ni.
" Kristian kan ni angin, kan ṭhu mai mai rei tawh lutuk a ni. Malsawmna kan dawng a, mahse malsawmna hian mawhphurhna a kengtel. Pathianin eng ti turin nge a koh che? chu chu ti rawh," tiin a album thar chungchang hi a sawi.
John Schlitt hian kum 1986 khan Petra a zawm a, kum 2006-a an kehdarh hnu khan solo-in a kal zui a, Mizoram-ahte pawh a band-te nen an rawn kal tawh a nih kha. Petra-a a tel lai reng pawh khan solo album pahnih- Shake (1995) leh Unfit for Swine (1996) a tichhuak tho bawk.
Petra angin kehdarh tawh mah se kum 2007 khan II Guys From Petra tih hmingin Petra-a a telpui Bob Hartman leh Greg Bailey-te nen 'Vertical Expressions' album an tichhuak leh tho a, hemi hnu erawh hi chuan solo-in a kal deuh ta ber. Mahse kum 2016 khan Union of Sinners & Saints thawhpuiin album an tichhuak a ni.
GO track list:-
1. Go
2. Feel It
3. Takin' It Higher
4. Fighting The Fight
5. Just Let Go
6. Time Keeps Rollin'
7. Where Would I Be
8. Find a Way
9. Fake News
10. Let’s Go
11. Not Dead Yet