IMI 2.0 chungchang thlirlet
Lunglei District Task Force on Immunization chu February 28, Zirtawpni khan an chairman, DC V Lalsangliana hoin a pisaah Intensified Mission Indradhanush 2.0 (IMI 2.0) thawh thumna an thlirlet V Lalsangliana chuan hri danna pek chungchanga Lunglei chhunga thawktute ṭhahnem ngaihna leh taimakna chu fakawm a tih thu sawiin, "Hun lo kal leh zel turah pawh line department-te nen ṭang hoin hlawhtlinna ṭha neih zel a pawimawh," a ti.
Lunglei district immunization officer Dr Lalrinthangi chuan naupang hridanna thawh thumna pek tawha an hmalakna leh an hmachhawpte a sawifiah a, Lunglei district chhungah an beisei aia an thawh ṭhat thu leh hmun ṭhenkhatah chuan an hmachhawp an khum thu a tarlang.
Dr Lalrinthangi tarlan danin Lunglei district chhunga health centre 16-a naupang kum hnih hnuailam target mi 111 hnena hri danna pek turah naupang 116 an pe a, nu raipuar mi panga hri danna pek turah mi pasarih an pe bawk.
IMI 2.0 thawh lina chu Lunglei khawthlang lam Bunghmun PHC leh Lungsen PHC bakah Tlabung SDH chhunga khaw 14 a naupang kumhnih hnuailam 67 leh nu naupai pathumte hnenah hri danna hi pek tura ruahman niin kim taka pek a nih theih nan Health Centre huamtu BDO te nen mipui hrilhhriat chungchangah a ṭul anga thawh ho nise, an ti.