ZPM Ṭhalaiin Mizoram leh Assam ramri an tlawh Ramri vei ngam sorkar kan mamawh - ZPM Ṭhalai President

Zoram Peoples Movement (ZPM) Ṭhalai hruaitute chuan February 28, Zirtawpni khan Vairengte daia Mizoram leh Assam inrina an tlawh a, ZPM Ṭhalai president Malsawmzuala chuan Mizoramin ramri vei ngam sorkar a mamawh thu a sawi.

ZMP Ṭhlalai hruaitute hian Vairengte police check gate thlanga 1st IR Battalion awmna an tlawh a, helaia lo duty-te chuan mi 27 duty tur an awm thu te, tui lamah harsatna an tawh thute leh duty quarters chhe tawh chu thawmṭhat tumna a awm mek thute an lo hrilh a ni.

ZMP Ṭhalai thuchhuah tarlan danin, Mizoram leh Assam intlantawnna autorickshaw stand leh a bul hnaiah Assam lam aṭangin in sak a awm nual a, ruihtheihthil an zuar bawk. Heng hmuna in sa Assam mi leh sate hian Assam sorkar aṭangin ­phalna an neih thu an sawi a, document hmuh tur erawh an nei lo thung.

Inner Line Permit (ILP) check gate-a thawkte chuan online-a Assam NRC hmuh tur a awm tak loh avangin NRC nei lo pawh an pe tih an sawi thu ZPM Ṭhalai chuan an tarlang. ZMP Ṭhalai president Malsawmzuala chuan an thil hmuhte a/angin ram hruaitute chuan ramri an vei tak tak lo tih sawiin, "Aizawl khawpui aṭangin venhimna ṭha taka kalpui a nih thu an sawi leh ringawt ṭhin hi a veiawm hle. Ramri hi vawilehkhata chinfel chi a ni lo tih chu kan hre vek, mahse Reserved Forest Area-a Mizoram lamin eng emaw an tih ve pawh a, sorkar thuneitute ngeiin a ni la laa an ṭhiah/laksawn laia, Assam lamin in te sa a, an duh duh zalen taka an rawn ti zar zar mai hi Mizo kan nihna ang pawhin a tlawm thlak," a ti.

Malsawmzuala chuan ILP pekchhuahnaah Assam NRC-a tel lo pawh pekchhuah a ni chu ṭha lo an tih thu sawiin, sawifiah turin Mizoram sorkar a phut.