Raw ching turte ṭanpuina sum pek an ni SEDP hi NLUP ang a ni ve lo - CM

Hmunpui rama Model Bamboo Plantation hmuna raw ching turte hnenah Inrinni khan Lengpui community hall-ah ṭanpuina sem a ni a, khuallian chief minister Zoramthanga chuan SEDP chu NLUP ang a nih loh thu a sawi.

Chief Minister chuan NLUP hnuaiah kum 10 deuh thaw a sema sem a nih tawh avangin, SEDP hnuaiah 'engtikah nge in sem dawn' tih zawhna an dawn nasat thu sawiin, "SEDP hi NLUP ang a ni ve lo.  NLUP pawisa an sem a, an hnathawh an ngaihtuah zui lem lo. Keini chu hnathawh chin chiah chiah zelah kan kal dawn a, thawh chin zelah ṭanpuina inpek a ni ang. Kan kal chhoh zel dan turah kan fimkhur em em," a ti.

Rua lama hmapui lakna tak tak chu state dang zingah ti an la awm ve loh thu sawiin CM Zorama chuan, "Mizoram hi a ti hmasa ber kan ni. Kan zir chawp tlang a, India ramah entawn tur a awm lo. Kan dap chawp a, kan zir chawp a, kan phuah zawh loh deuh a la tam.  Tihsual leh tihṭhat ngai pawh a awm ang," a ti a, raw hmanga ropui taka dinchhuah hun Pathian zarah a awm ngei a rin thu a sawi.

Chief Minister sawi danin, raw project kalpui tura an buaina chu pawisa pe tu tur ber sorkar laipui zirtir chawp an ngaih vang leh a chi duh ang neih theih a nih loh vang a ni. Tuna raw chi siamtute chuan chi an siam chhuah dan chu midangin an hriat ve chuan an business a hlawk loh an hlau a, midang an hrilh duh lo a ni. Thla tin a ṭiak 10,000 vel an siam thei a, an laboratory tih len a, a aia tam siam chhuah theih an tum a ni. Nikum aṭangin chah ṭan chauh a ni bawk si a, an siam chhuak tam thei bawk si lo a, chuvangin a chi duh anga tam hmuh theih a ni lo.

Zoramthanga chuan ṭin nga hmunah raw hmangin cheng nuai 5 aia tlem lo lakluh theih tura a hisap thu sawiin, "Raw hralhna turah buaina a awm lo. Rin aiin a hmanna a tam. Paih tur a awm loa, a chhe lai ber a lawk lai lah tih dipin plyboard atan a ṭha em em a ni. Economy atan a ṭhatzia kan hre zel ang. Ṭha taka process chuan raw pum khat hian Rs. 1000 aia tlem lo a thar chhuak thei," a ti.

Inkhawm hi Horticulture director Elizabeth Saipari'n kaihruaiin, Bamboo Development Board vice chairman Dr K Pachhunga leh bialtu MLA Lalzirlianate pawhin thu an sawi. Raw ching tur ṭanpuina dawngtute hi Lengpui khua mi 126 leh Hmunpui khua mi 100 an ni a, lo vahna tur Rs. 10,000 leh mangkhawhna tur Rs. 2,500 ṭheuh pek an ni. Ṭanpuina dawngtute hian Model Bamboo Plantation hmunah rua an ching dawn a ni. Model Bamboo Plantation atan hian sorkar chuan Hmunpuiah ram acre 250 a zau a ruahman a ni.