MNF hmai a uang ta em ni? - ZPM Ṭhalai

ZPM party ṭhalai chuan, Covid-19 laka invenna leh donaa sorkar hmalaknaah duhkhawp loh lai tam hle mah se, insawisel vak vak a hun lo a, a ṭha ber loa ngaiin pawl leh mimal tam takin ngawih an chuh rih tih an tarlang a; miin an sawisel duh lohlai chuhin sorkar lai MNF party chu an hmai a uang ta mah mah nia a lan thu an sawi. ZPM ṭhalai thuchhuah chuan, "Miin ngawih an chuh laia MNF ṭhalaiin sorkar hmalakna a ṭha ber ni āwma an rawn fak chiam tākah chuan, kan ṭhat tāwk lohna lai sawi chhuah hi sorkar leh mipuiin kan ṭhatpui zawk dawn niin a lang," a ti.

Coronavirus donaah sorkar, kohhran, khawtlang hruaitute leh mipuite ṭangrualin hma an la mek a, party tin MLA-te pawh an bial ṭheuhah mamawh ngaihtuahin an buai tlang hle tih sawiin ZPM ṭhalai chuan, "Doctor, nurse, health worker leh thawktu dangte an fakawm hle. Task force member-te inpekna a ropuiin a fakawm hle a ni," an ti a; Health Minister leh HFW-a thawkte hmalakna chu lawmawm an tih thu an sawi.

ZPM ṬHALAI TARLANTE

* Sorkar inhmakhuana a ṭha tawk lo tih chu ramria khaw awmte'n an hre chiang ang. Leng pui Airport-a passenger tang khantirte harsatna tawhte kha.

* Aizawla quarantine centre leh an capacity nen lam sorkarin a puan hnu daihah hman turin an lo la inpeih lo hle. Hmun ṭhenkhata sorkarin quarantine a tih mekte chaw puar khawp pek an ni lo.

* Hnam dang, Mission Venga a in luaha thia chhar hlawm chungchangah sorkar inbuat saih na a ṭhat tawk lohzia a lang.

* Local task force, traffic police leh police duty-te PPE, a bikin glove leh mask-te sorkarin an mamawh khawp a pe lo.