Mirza-i'n vaibelchhe 1.25 thawk chhuak
India tennis star Sania Mirza chuan Covid-19 dona kawnga mite ṭanpui nan sum a thawh a, a thawh bakah hian midangte chu thawh ve turin a sawm bawk - chawlhkar khat chhungin vaibelchhe 1.25 an thawk chhuak hman.
Doubles huanga world number 1 hlui Mirza chuan, "Kar hmasa khan mite kan ṭanpui ve theih nan team kan din a, chumi kaltlang chuan hma kan la. Kar khat chhungin vbch 1.25 kan nei a, kan phak chinah mi nuai khat hnenah ṭanpuina kan pe tawh," a ti.
Sania leh a team-te hian mi harsate chu ei leh in tur an pek bakah nitin nun phunga mamawh an neih dangte an leisak bawk. India ram pum chu coronavirus vangin a inkharkhip mek a, mi harsa ṭanpui ngai an tam hle.
Kum 33 mi Mirza chuan sawi zawmin, "Khawvelin hun harsa a paltlang mek a, mitinin mahni in lum aṭanga he hun paltlang theih hi a duhawm hle. Mahse, chenna in nei mumal lo leh ei tur nei mumal lo an tam a, an dinhmun kan hriatthiampui a ngai," tiin a sawi.