Khabib vs Ferguson a thleng thei lo!
Khawvel hmuh chak UFC lightweight champion Khabib Nurmagomedov leh Tony Ferguson inhnek tur chu a vawi nga nan sawn hlat a ngai leh dawn ta a, tun ṭum erawh coronavirus hri leng vang niin mipui tan phun nawi theih a ni lo.
UFC 249 hi a tirah chuan New York khawpuia neih tura ruahman a ni a, Covid-19 vangin neih a rem lo zui. UFC president Dana White chuan, "Hmun dangah tal kan neih maina chance hi 99.9% a ni," tiin a sawi zui.
Mahse, Khabib chuan social media lamah thil thlen dan a sawi zui a, an ram Russia-ah a awm mek avangin mipui beisei angin fight hi a thlen a rinawm loh.
Vawi 28 fight a hmachhawn tawha tlawm la nei lo Khabib chuan, "Training kan neih reng laiin US-ah fight neih theih a nih loh thu min hrilh a, mahse UAE-a fight neihna chance chu 99% a nih thu min hrilh thung.
"UFC nen inbiakna kan neih hnuah UAE lam panin kan chhuak zui a, mahse UAE hian ramri te an khar tur thu kan hre zui. Russia lam panin ka haw a, training ka nei reng chungin ramri chhuahsan min phalsak lo," a ti.
Khabib chuan, "UFC 249 hi ka tel lo a nih pawhin kaltlang pui an tum tho niin ka lo hria a, an duh chuan kaltlangpui rawh se," a ti zui.
Kum 31 mi fighter hian UEFC 249-a inlan loh chu a tan chuan sum hlohna lian tak ni mah se dan zawm a ngaih avanga a tel theih loh thu a sawi a, hetihlai hian Ferguson chuan Khabib hi 'dawihzep' tiin a lo sawisel thung.
Ferguson chuan, "Russia-ah khan i biru mai mai a ni. Zin chhuah phal loh hi chhuanlamah i hmang a, fight neih theihna hmun tur tam tak kan thawn tawh bawk che a, i duhthlanna hmun chu min thawn ve ta che," tiin Khabib chu pan hial a duh thu twitter lamah a pholang.
Khabib leh Toby inhnek hi UFC fan-te chuan hun rei tak an nghak tawh a, hmuh an chak zek zek - mahse, an beisei angin a thleng thei lo a, tuna an inhmachhawn tur hi ṭhulh a nih chian chuan a vawi nga nana fighter pahnih inhnek ṭhulh/sawn a nihna tur a ni.
Khabib vs Tony - Vawi li an sawn tawh
*2015 - Khabib-a'n a nakruh lamah hliam a neih avangin a inhnukdawk
*2016 - Ferguson-a'n a chuap lamah harsatna a tawk a, a inhnukdawk
*2017 - Ferguson-a'n a kal (kidney) lamah harsatna a nei a, ṭhulh a ni.
*2018 - Media an hmachhawnna lamah Ferguson-a chesual a, a khupah hliam a neih avangin a vawi li nan Khabib vs Tony chu ṭhulh a ni.
*2019 - Covid-19 hri leng vangin Russia-ah Khabib a tangkhang a, fight neih a rinawm ta lo hle.