KHAWTHLIR
Telh belh
Aizawl District Magistrate chuan, Aizawl Municipal Corporation chhunga páwn chhuah khapna (curfew)-in a huam loh tur zingah Excise & Narcotics department, AH&Vety department hnuaia dispensary-a thawkte leh Environment, Forest and Climate Change department-a thawk para C(f) of GOI, Ministry of Home Affairs Order No. 40-3/2020-DM-I (A) Dt. 25-03-2020 in a sawite telh belh a nih thu a puang.
MDC-in quota hlan
MADC-a MDC hluite leh MDC ni mekte chuan an thla khat khawnvartui quota chu Covid-19 vanga harsatna tâwk leh chhungkaw harsa zualte hman atan an thawh. Khawnvartui hi Siaha DCSO leh village task force-te enpuina hnuaiah sem a ni ang.
Zangnadawmna
Tuialhthei zuartu marketing company pathum - IOC, BPCL leh HPCL-te'n eirawngbawlna gas semna kawnga hna thawktu - showroom enkawltu, kudam nghaktu, mechanic leh gas semtu (delivery boy) te, an hnathawhna aṭanga Covid-19 kai palh vanga thi an awm chuan an chhungte hnenah zangnadawmna Rs. 5,00,000 zel pek a ni dawn.
Luah man àwl
Seventhday Adventist Mizo Conference chuan an in hrang hrang ni tin eizawn nana mimal an luahtirte (workshop, dawr, chenna in) chu a luahtute'n mumal taka an hawn theih loh avang leh ei bar zawn a harsat rih avangin April 2020 thla luah man an la dawn lo.
CM-in buhfai sem
Aizawl East-I bialt u MLA Zoramthanga, chief minister chuan a bial chhunga mi harsa leh mamawh zualte hnenah buhfai bag 170, hand sanitizer leh hmai tuamnate local task force kaltlangin a sem.
Positive awm belh lo
Mizoram aṭangin Covid-19 an kai leh kai loh enfiah turin mi 44 te sample phai lamah thawn a ni tawh a, heng zingah hian pakhat chiah positive a la awm. Nimin khan sample thawn hnuhnun mi 15 te result a chhuak a, an vaiin an negative vek. Sample thawn thar a awm tawh hrih lo.
Control room
Mizoram sorkar chuan Mizorama Covid-19 hri leng mek venna tura lockdown a kalpui mekah englaipawha boruak awmdan thli thlai reng turin Aizawl Police Station-ah Police Control Room an siam. Hei hi mipuite'n an harsatna an thlen theihna tur leh mipuite nitin mamawh buaipuitu leh state dang aṭanga bungraw phur lut tu ten harsatna an tawh changa an mamawh an thlen zung zung theihna tura din a ni. Police Control Room hi telephone number 0389-2322375 leh mobile phone number 8794747291 ah biak pawh theih reng a ni.
Isolation ward-ah Awm an awm lo
State Refferal Hospital (SRH), Falkawn aṭanga thudawn danin, tun dinhmunah isolation wardah awm an awm lo. Isolation ward-ah hian Covid-19 kaia rinhleh zual deuhte dah ṭhin an ni a, isolation ward-a awmte pawh an sample endik a nih hnuah Covid-19 an kai lo tih hmuh chhuah zel a nih avangin chhuahtir zel an ni.
MP fund atangin nuai 100 pe
Lok Sabha MP C Lalrosanga chuan, Covid-19 donaa hman tur, damdawi lam hmanrua personal protective equipment, hmai tuamna, sanitizer, test kit, ventilator, infrared thermometer leh a ṭul dangte leina atan MP fund cheng nuai 100 a pe. MP chuan pawisa chu a remchang hmasa bera pe chhuak turin nodal officer (Aizawl DC) a hriattir nghal a ni.
Vety-in hawng
Covid-19 avanga khar veterinary hospital, dispensary leh RAH centre-te chu Mizoram sorkarin ranvulh leh a kaihhnawihte essential service-a a puan avangin emergency case-a dawr theih turin nimin aṭang khan hawn leh ṭan a ni.
Thisen pe
Siaha District Hospitalin thisen an neih loh avangin Saiha College NSS unit chuan nimin khan blood bank-ah thisen unit 11 an pe a, a petute mipa pakua leh hmeichhia pahnih an ni.
Puih inhuam
Mipui ni tin mamawh phur lirthei khalhtute ei leh in mamawh emaw, lirthei siam ngai emaw neite tan Aizawl, Lunglei, Siaha, Champhai, Kolasib, Ser chhip, Lawngtlai, Mamit district-a hotel/workshop hrang hrangte chuan engtik lai pawhin ṭanpui an inpeih reng thu an puang.