Sum lapse a awm lo ang - Finance Commissioner

Finance commissioner Vanlalchhuanga chuan kum 20192020 a Mizoram sumte chu chinfel hman a nih thu sawiin, "Lapse a awm lo ang," a ti. Kum 2019-20 sorkar kum chu nimin khan a tawp a ni. Vanglaini palai zawhna chhangin Vanlalchhuanga chuan sum chingfel turin theihtawp an chhuah tih a sawi a, "Bill awm ang pek chhuah theihte pawh kan pe chhuak kim.

A tira pek chhuah kan tum loh, autonomous district council (ADC) sum tur chu vawiin (March 31) khan pek chhuah leh a ni a, chu chu sum pek chhuah hnuhnun ber a ni. ADC-te hi Mizoram sorkar nen hlawh lak dan kalphung a in ang loa, anni chuan March-April an lak laiin, Mizoram sorkar hnuaia thawkte chuan February - March angin hlawh kan la," a ti.

Finance Commissioner sawi danin, Covid-19 avanga hmasawnna hnathawh hleih theih a nih loh avangin sum hman loh enge mawzat a awm a, chungte chu loh theih loh avangin K deposit-ah dah an ni. Reserve Bank of India chuan sorkar kum a tawpin ni 5 chhung state sorkar sum dinhmun chinfelna hun an nei a ni. An chinfel zawh hnu April 8-ah sorkar hnathawk hlawh chu thun ṭan tum a ni.