Inrenchem turin ngen

Information & Public Relations (IPR) minister Lalruatkima chuan, ei leh barah thlaphang lo turin Mizoram mipui a chah a, chutih rualin, lockdown ni 14 la awm turah ei leh bar, kawlphetha, tui leh thil dangahte inrenchem turin a ngen.

Vawiin April Fool-ah mi tihder tuma dâwt thehdarh lo turin mipui a hriattir bawk. Lalruatkima chuan, Mizoram anga Covid-19 laka invennaa hma la ṭha an awm a hriat loh thu sawiin, "Kohhran, NGO leh sorkar nen thawhhona ṭha kan neih avang a ni. Kohhran/ khawtlang/village/local task force-te ṭhahnem ngaihnaah mipuite an thlamuang a ni," a ti a; Covid-19 laka invenna hna thawktu Health department, dan leh thupek kengkawhtu, tui, kawlphetha leh pawl hrang hrangte inpekna chu lawmawm a tih thu a sawi.

IPR Minister chuan, social media hrang hrangah mipuite'n thuthar an hriat zung zung theihna turin sorkarin theihtawp a chhuah tih sawiin, "Sorkar thuchhuak ni lo chu ring mai lo tur leh chiai mai lo turin ka ngen che u. April 1 (vawiin) hi April Fool a nih avangin mipui tichîâi zawng leh social media-a thu dik lo vawrh darh lo turin mi zawng zawng ka chah bawk," a ti a; mi tibuai zawnga thu dik lo thehdarh a awm a nih chuan a titute chungah dan lekkawh a nih tur thu a sawi a ni.