CAA, NPR leh NRC hi Eirukna leh inhuatna thlen tirtu : Kannan Gopinathan

Sorkar laipuiin Citizenship Amendment Act (CAA), National Population Register (NPR) leh National Register of Citizens (NRC) a kalpui mek hi eirukna leh inhuatna thlen tirtu a nih thu, nikuma IAS aṭanga bang ta Kannan Gopinathan chuan a sawi. 

CAA hian Indian Constitution-a inziak sakhaw tihbik nei lo (secular) tih chu a kalh chiang hle niin Kannan chuan a sawi a, hei vang hian ramchhunga mipuite chuan CAA hi an dodal a ni, a ti bawk. Kannan chuan Muslim teloa Hindu, Sikh, Jain, Kristian, Parsis leh Buddhist sakhaw zuitu, Pakistan, Bangladesh leh Afghanistan ram aṭanga rawn lutte chauh India khua leh tui nihna pek an nih hi mak a tih thu sawiin, ramdang 

aṭanga lutte a huam loh chhan hi sorkar laipui a zawt let bawk a ni. 

NPR leh NRC-te hi mirethei, tribal leh hmeichhiate  dodalna a ni a, hei hian eirukna kawng min zawh tir thei a ni tiin Kannan chuan a sawi bawk. Sorkar laipuiin nikum August 5-a Jammu & Kashmir (J&K) special status Article 370 a hlih avanga IAS aṭanga bang zui ta, Kannan chuan sorkar laipui hmalakna hi na taka sawisel nghalin, J&K state chhung mite zalenna rahbehsak an nih thu thuthar theh darhtute hmaah a sawi.