Zalênna zaninah tlangzarh dawn

Mizo film thar 'Za­lênna' chu zanin dar 6:30 hian Vanapa Hall-ah tlangzarh a ni dawn.

One Vision Media Ministry film siam Zalênna hi Pathian thu zirtirna kengtel film a ni dawn a, Mizoram buai lai behchhana film siam niin Mizo film star kan neih ṭhat ber berte he film-ah hian an chang a, hmel thar pawh kan hmu dawn a ni.

One Vision Media Ministry hi Nunna Thar film siamtute tho kha an ni a, ṭhalai leh nau­pangte tan pawha en him, Pathian thu leh nundan ṭha inzirtirna film ṭha tak a ni dawn. He film hi Saitual ramah thla khat zet riahchilin shooting an nei a, scene ṭhenkhat erawh Aizawl lama shoot a ni thung a, a film buaipuitute'n an uluk bawk a, en a manhla ngei ang.

"Kan nuna harsatna lo thleng lak aṭang hian zalenna kan zawng a, ṭhenkhat chuan ruihhloah te, sex lamah te leh khaw­vel sum leh pai neih hnem lamahte kan intlan­siak nasa em em tawh a. Mahse Zalenna tak tak leh, chatuan daih zalenna chu 'Isua Thisen' chauh kha a ni tih hi he thawnthu hmang hian tihlan a ni," tiin script ziaktu leh director ni bawk Lalnunsiama (SVP) chuan an film siam chungchang hi Vanglaini a hrilh.

Nunna Thar-a a chang­tupa, zaithiam Andrew Laltlankima kan hmu leh dawn a, Sangtei Renza leh Adama-te pawh an inlan leh dawn a ni. Stacy's Penitence vocalist Jeremy Ralte kan hmu dawn bawk. Scooty film lama kan hmuh tawh Zorina leh Papuia Pachuau-te an inlan dawn a, Where a changthiam tak mai Elivis-a pawh kan hmu dawn a ni.

'Zalênna' film Ori­ginal Sound Track hi Nilaini zan khan YouTube-ah dahchhuah a ni tawh bawk. Andrew Laltlan­kima chuan thiam taka sa in, sound track hi K Hminga kutchhuak a ni nghe nghe. Zalênna music video en tawhte chuan a film hmuhnawm tur zia an hriain a rinawm.