All India service-a tlin tum tak tak ṭhalaite MICSAS-in an pui dawn

MICSAS Chairman chuan, zirlai, all India servive hmachhawn tum zawng zawng an puih theih dawn loh thu sawiin, "Zirlai tumruh, coaching kalna nei si lo, hma lam hun êng site kan tinzâwn a, kan sum neih ang zelin kan sponsor ang," a ti. Tlin ngei tuma awm ngar ngar tur chauh an duh thu sawiin, "Mizorama rawn haw a, heta hna rawn zawng leh mai tur ang chi chu kan duh lo," tiin, sum an neih dan enin a bul ṭan nan mi pahnih/khat chauh an la tirh theih tur thu a sawi bawk.

MICSAS hian zirlai/ṭhalai an puih turte chu mumal taka din selection board kaltlangin UPSC syllabus kalphung leh question hluite hmangin written test (general studies & general english), personal interview leh performance evaluation-te neihpuiin an thlifim dawn a; an thlante chu Aizawlah thla hnih vel guidance & councelling an neihpui ang a, chumi hnuah Delhi lamah coaching kal turin an kaltir ang. Coaching course an kal chhunga senso zawng zawng chu an tumsak vek dawn a ni. 

MICSAS-a test nei duh tan Sunflower Electronics, Chanmari leh Splash, BSNL franchisee (Customer Service Cenre), Chanmari-ahte dilna form February 3-15 chhungin lak theih a ni a, February 28, 2020 thleng thehluh theih a ni. March 20-ah written test neih a ni dawn a, personal interview leh guidance & councelling neih hnuah Delhi-a coaching kal tur final selection chu May, 2020-ah neih a ni ang.