Ramngawin Mizoram a tuam zat a tlahniam

Champhai District Fire Prevention Committee chu nimin khan additional DC Mark Lalthanliana hoin DC conference hall-ah an ṭhu­khawm a, February 10-15 chhunga 'Kângmei ven hapta' (Fire Prevention Week) hman dan tur leh kumin ṭhál laia Champhai district-a kângmei a chhuah lohna tura hmalak dan turte an rêl. Mizoramah ramngawin a tuam zat a tlahniam tih tarlan a ni.

Mark Lalthanliana chuan, Champhai district mipui chu nikuma kângmei véng ṭha ber district an nihna hre rengin, nikum aia ṭang leh zuala beihpui thlak turin a sáwm a, "Thupek zâwm loa ram tikângte chungah dan ang taka hremna lekkawh a ni ang. Kângmei vèn leh ṭhelh kawngah neitu nihna thinlung pûa theihtawp chhuah a ṭul," a ti.

Meeting chuan, Kangmei Ven Hapta hawnna chu February 10, 2020-ah hman turin an rel a, a hmun leh hun hman dan tur kimchang chu Environment, Forest & Climate Change department kutah an dah.

Hapta chhungin kângmei laka fimkhur tura inzirtirna, kângmei vên ṭangkaina leh kângmei chhuak ṭhelh kawnga hriat tur pawimawhte leh ṭulte a zau thei ang bera puanzar ni se an ti a; YMA information centre leh V/C aurinna hmangtea zirtirna lam hawia thu puan te, thuchhuah siam te, zirlai naupangte hnenah kângmei ven kawnga zirtirna pek leh kohhran lamte pawh thu pawimawhte puangzar tura ngen ni se, an ti.

Village Fire Prevention Committee an din a, khua leh veng tinah kângmei ven kawnga inzirtirna awareness campaign Gram Sabha kaltlanga neih ni se, an ti a; kângmei ven kawnga inzirtirna ennawm (animation) hmanga siam leh kângmei vêng ṭha khua leh kângmei vèn lam chhuah ṭha chanchinbute hnenah lawmman pek leh an rel bawk.

Meeting chuan, lo leh leipui vâtte chu kawngpui vât chhuak lo tur leh, sorkarin lo hâl hun hnuhnung a siam March 15, 2020 aia tlai loa hâl vek turin an chah a ni.

December 2017 aṭanga February 2018 chhunga satellite data hmanga zirchianna ISFR-2019 report-in a tarlan danin, ramngawin Mizoram a tuam zat chu 85.41% a ni a, kum hnih kal ta 2017-2019 chhung khan sq.km. 180.49-in a tlahniam. Mizoram pumah kum 2017-a ramngawin Mizoram a tuam zat chu 86.26% a ni a, kum 2019-ah chuan 85.41%-ah a tlahniam a, a tlakhniamna chu 0.85% a ni.