Arsenal-in player thar nei dawn

Premier League club Arsenal chuan Flamengo defender Pablo Mari an lalut dawn a, inremna ang chuan season tawp thleng atan loan-in an la phawt ang a, nipui transfer-ah an duh chuan a nghetin an lalut thei ang.

 

Flamengo hian Mari thlaktu tur defender Leo Pereira chu Athletico Paranaense aṭanga an lakluh tawh thu an puang a, he thu buatsaih lai hian Arsenal-in official takin an player lakluh hi an la puang lo thung. 

Gunners hian tlar-hnung lamah buaina an tawk mek a, hliam vanga Calum Chambers, Kieran Tierney leh Sead Kolasinac an chhawr theih loh hnuah Shkodran Mustafi chu FA Cup fourth round-a Bournemouth an hmachhawn ṭumin a inhliam ve leh a ni. 

Kum 26 mi Mari hian 2016 khan Premier League club Manchester City lo zawm tawh mah se English football-ah a inlan hman lo a, Brazilian football season hman zawh taka Flamengo chet ṭhat nan a thawhhlawk hle. 

Flamengo hian Serie A nomawi an chawi bakah South American Champions League tia hriat lar Copa Libertadores-ah an champion bawk a, Mari hi Serie A Team of the Year-ah a lang a ni.