Zverev-a'n semifinal a thleng

Australian Open-ah Alexander Zverev chuan nimin khan Stan Wawrinka chu 1-6, 6-3, 6-4, 6-2 in a hneh a, German star hian a vawi khat nan Grand Slam semifinal a lut.

Kum 22 mi Zverev hi big three Roger Federer, Rafael Nadal leh Novak Djokovic elpha ber tura ngaih ni mah se inelna ngaihhlut ber Grand Slam-ah a che ṭha ṭhin lo.

Zverev chuan, "World Tour Finals, Masters leh inelna dangah te nomawi ka chawi tawh a, Grand Slam-ah ka hun a thleng thei ṭhin lo. Ka lawm dan hi min hriatthiampui lo ang. Final ka thleng thei a nih phei chuan ka hun tawna ropui ber a ni dawn a, amaherawhchu kei chuan nomawi ka duh," tiin champion a tum thu a sawi.