Iran-in missile hmanga US sipaite a beihnaah US sipai 50-in TBI an tawrh phah
Kumin kumtira Iran-in Iraq-a US sipaite hmun pahnih ballistic missile hmanga a kah hnu khan missile puahna avangin US sipai 50-in 'Traumatic Brain Injury (TBI)' an tawrh phah thu Pentagon chuan a puang.
Kha thil thleng vang khan a hmain Pentagon chuan mi 34-in an tawrh phah thu a lo sawi tawh a, mahse 'traumatic brain injury' mi 16 an awm belh thu Pentagon chuan a hnuah a sawi belh leh a ni. Sipai 50 zingah hian mi 31-te chu Iraq-a US sipai damdawi-ina enfiah an nih hnuah an duty-na ngaiah dah luh leh an ni. Midang 15-te chu enfiah mek an la nih thu Pentagon thupuangtu Lieutenant Colonel Thomas Campbell chuan a sawi.
US-in Iran Revolutionary Guard commander Qassem Soleimani an thah avanga January 8-a Iran-in missile hmanga Iraq rama US sipaite awmna, Anbar province-a Ain al-Asad base leh Erbill base an beihnaah khan, a tirah Pentagon-in US sipai thi leh hliam an awm loh thu tarlang mah se, a hnuah kha thil thleng vang khan US sipai zingah 'traumatic brain injury' an awm phah thu Pentagon chuan a tarlang leh hnuhnawh a ni.
Traumatic brain injury neite hi an lu a nat ṭhin bakah, an lu a hai ṭhin a, an luakte pawh a chhuak ṭhin bawk. US-in a tira an sipai hliam an awm loh thu a tarlan avang khan, US war veteran group-te chuan Trump-an US mipuite lakah ngaihdam a dil tur a ni tiin an kar zui bawk.