United-in B. Fernandes an la beisei

Manchester United chuan Bruno Fernandes lak tumin Sporting Lisbon nen an indawr leh tawh tih thawm a awm a, tun ṭuma English club dawrna hi euro maktaduai 55 nia ngaih a ni.

Sporting captain Bruno Fernandes hian United pan duh mah se club pahnih hi transfer fee chungchangah an inrem thei lo a. Portuguese club hian kum 25 mi midfielder manah hian euro maktaduai 80 an beisei a, United lamin an chhiarna zata lak nghal an tum lo thung.

Thawhlehni zan khan Sporting hian Taca da Liga semifinal-ah Braga 2-1 in an hneh lo a. Media ṭhenkhatin Bruno Fernandes tan Sporting tana a match hnuhnung ber a nih theih thu ziak mah se Portuguese midfielder hian lungawi loin khelmual a chhuahsan a, mipui thlahna pawh a nei lo.

BBC-a sports ziaktu Simon Stones chuan, "United hian Bruno Fernandes hi season thlak danglam thei turah an ngai lo a, chutihrualin tuna an player neih lai aia ṭhaah chuan an ngai thung. Hei bakah hian McTominay inhliam leh Pogba hmalam hun chiang lo vang hian an mamawhna chin a awm," tiin a hmuh dan a sawi.

Nipui transfer sawi kaiin Simon Stones chuan, "Nipui transfer-ah khan United-in Bruno Fernandes hi an en kan. Player ṭhaah an ngai lo tih lam ni loin an lak tum zingah an telh lo," tiin United duh ber a nih ṭhin loh thu a sawi.