Liverpool captain Hendo-a inhliam

Premier League hmahruaitu Liverpool captain Jordan Henderson chuan a malpuiah hliam a tuar a, Reds manager Jurgen Klopp chuan a player pawimawh hi kar thum vel tal a chawlh a ngaih tur thu a sawi. 

Liverpool hian kar hmasa khan Champions League last 16 first leg inkhelah Atletico Madrid chu 1-0 in an ngam lo a, he inkhelah hian hliam vangin Hendo hi lakchhuah a ngai. 

Reds fan-ten hlauthawng taka an captain chanchin an ngaihven laiin chawlh a mamawh thu an hre zui. Klopp chuan, "Hendo hi kar thum emaw a aia tam hret pawh a chawlh a ngai mai thei. Thu hriat nuam tak a ni lo a, mahse kan thlir dan chuan vannei kan inti a ni," a ti. 

Tottenham Hotspur captain Harry Kane chu malpui hliam vang thoin a chawl mek a, January 1-a inhliam striker hi April-ah bak a lo kir beisei a ni lo. Kane-a chawlh rei dan ngaihtuahin English striker ang thoa inhliam Hendo chawl rei lo tur hi Klopp chuan vanneihnaah a ngai a ni. 

Hendo awm loh chhung hian Reds hian Premier League-ah West Ham, Watford leh Bournemouth an hmachhawn dawn a, FA Cup fifth-round ah Chelsea hmachhawnin Champions League last 16 second leg-ah Atletico Madrid an hmachhawn dawn bawk. 

Hammers leh Liverpool inkhelh hun tur hi zanin dar 1:30-ah a ni a, tun season-a league match-a la tlawm miah lo Reds-in record duhawm chhunzawm turin Anfield-ah West Ham hneh an tum ang.