Assam kan hneh kan ring - Mizoram manager

India hmarchhak state-te football hmanga inelna Dr T Ao Trophy-ah Mizoram chuan vawiin tlai dar 4:30 hian Assam an hmachhawn dawn. Mizoram hian an match hmasa berah Meghalaya 6-0 in an sawp a, Assam hi Sikkim lakah an tlawm thung.

Mizoram manager T. Vanlalhluna chuan, "Meghalaya kha team ṭha tak an ni a, goal hmasa ber leh goal hnihna kan khung inkarah khan kei ni aiin goal chance an ngah zawk. Kan group-a team dang pahnih Sikkim leh Assam hi Meghalaya hian an hneh theih ka ring a, Assam hi kan huphurh hran lo," tiin Vanglaini a hrilh.

Tualchhung football-a tawnhriat ngah ber zinga mi Hluna chuan sawi chhunzawmin, "Meghalaya nena kan khelh danah khan coach nen kan lawm khawp mai. Player kan rem dan pawh a fuh viauin kan hria a, ball siam thiam R. Malsawmtluanga pui tura che reng pahnih MS Dawngliana leh Lalchungnunga awm te, tlarhmaa tawnhriat nei ṭha F. Lalrinpuia leh Vanlalthlamuana te inkawpte khan an hna an hre chiang em em a ni," tiin a sawi a, Assam laka bul 

ṭan tur erawh a la sawi thei lo thung.

Vawiin hian group B inkhel dangah Sikkim leh Meghalaya te tlai dar 2:00-ah an inkhel dawn a, group khat aṭang hian team pahnihin semifinal an lut ang. 

Dr T Ao Trophy hi YouTube-a 'Nagaland & North East Cornerstone TV' channel-ah live ṭhin a ni.