Fury kuttum hmaah Wilder a zawr

"Lalber chuan a lal ṭhutthleng chungnung tak chu a luah leh ta," tiin Tyson Fury chuan Deontay Wilder a knockout zawh hnu lawkah a sawi a, WBC world heavyweight title chu Fury-a ta a ni ta. 

Nimin khan Las Vegas khawpuiah boxer ropui pahnih an inhmachhawn a, rin hlawh zawk Deontay Wilder-a'n Fury-a thiamna leh hnek na tak chu a dawl zo a, Fury a dingchang. 

"Wilder hi ka knockout ngei dawn a ni," tia Fury-a'n a sawi lai khan ringtu an tlem hle - boxer tam takin Wilder an ring zawk a, Fury hi a thusawi ang taka chet a tum chuan a chetsual tur thu an sawi. 

Mahse, a hun a thleng a, round sarihnaah Wilder-a pawlten an tlawm tih entir nan inhrukpuan var an thehlut a, Las Vegas khawpuiah 'champ' takin Fury a hawi vel - tu nge dem thei awm ang?

British boxer rothap hian vawi 267 zet a hnek chhuak a, chung zinga 82 chuang Wilder a tawng fuh - a hnek chhuah aṭanga 30.7% hmangin Wilder a hnek fuh tihna a ni. 

Wilder-a'n vawi 141 a hnek chhuak a, vawi 34 a hnek fuh - chu chu 24.1% tihna a ni a, American fighter hian kawng tinrengah Fury a tluk lo. 

Boxer pahnih hi 50-50 a hlawkna insem turin an inrem a, an sum dawn tur chiangsa hi dollar maktaduai nga ve ve a tling - hemi piahlamah hian pay-per-view leh ticket sales aṭangin hlep an la nei leh dawn bawk. 

Ticket sales aṭang ringawt pawh hian dollar maktaduai 16 chuang a lutah ngaih a ni a, PPV hi innghahna pakhat a ni bawk - heta ṭanga sum lut erawh kar hnih khat hnua hriat theih chauh a ni. 

Boxer pahnih hian a tlem berah dollar maktaduai 40 bawr ve ve chu an dawng tura ngaih a ni a, chak lo zawk Wilder tan pawh chak loh pawm thiam a awl deuh ang. 

Round 1

Fury-a'n Wilder knockout ngei a tum tih pholangin attacking game a khel nghal a, Wilder-a'n Fury chhaih kawlh tumin a kuttum a lek chhuak ve reng bawk - vawi khat hnek fuh mah se Fury a tlu duh lo. 

Fury-a'n one-two hmangin Wilder a hnek fuh a, American boxer a talbuai zui. Bell a ri a, Fury tan bul ṭanna ṭha tak a ni a, Wilder tan chhan chhuaktu a ni. 

Round 2

Fury-a'n second round-ah Wilder a knockout tur thu sawi mah se Bronze Bomber (Wilder sawina) kuttum a dawng a, Wilder a kuah bet zui - American boxer-in Fury a hnek chhunzawm. 

Mahse, Wilder-a hnek na tak tur a bum hnuah Fury a che fuh ve leh a, Wilder hi a kuahtuah a ṭang ve zui - fight inhnehtawk tak a ni. 

Round 3

Fury tak tak kan hmu ṭan - a kut dinglam chuan na zetin Wilder a deng fuh a, American fighter a ding zo lo. Nghet lo takin Wilder a ding chhuak leh a, a ka aṭangin thisen a chhuak - bell a ri zui a, a vannei takzet. 

Round 4

Wilder a tlu nawn a, mahse ring chhung nal vang a ni thung. Fury-a'n chawlh hahdam a tum lo a, Wilder knockout chu a tum ber a ni -  Bronze Bomber hian Gypsy King 'bum' chu hna berah a nei rih a, bell ri chu amah chhanhimtu a ni. 

Round 5

Fury-a'n a kut dinglam hmangin Wilder a deng fuh a, WBC champion ke a nghet lo - a vawi hnih nan a tlu a, a beng vei lamah thi a chhuak. 

Ding chhuak leh mah se Fury kuttum bawk chu Wilder lo 'welcome' tu a ni a, ring bawh tur a neih hnaih avangin a tlu loh hlauh!

Round 6

Wilder-a'n ngai a awh chho ṭan niin a lang a, mahse a lu hai erawh a la awm tih a hriat. American fighter hi inhnaihchilh ralah chuan hlauhawm tak a la ni reng a, a ke chheh a rem chho ṭan bawk. 

A hmingah Fury!!

Round sarihnaah Wilder-a'n ngai a awh thei tawh lo - corner aṭangin inhrukpuan var thehluh a ni a, Fury chu WBC heavyweight champion thar a ni ta - Wilder tan Fury a ṭha mah mah a ni. 

Pathianni zing inkhawm loa Fury leh Wilder inhnek entute tan British boxer-in sermon a thlak zui a, a hnehna chan chu Isua Krista vang a nih thu a sawi. 

Fury chuan, "A hmasa berah chuan ka Lal leh min chhandamtu Krista hnenah lawmthu ka sawi a ni. Ka laka rilru ṭha lo pute chu an ding chhuak lo ang tih ka sawi a, thim zinga awmte chuan êng lam an pan ve thei lo. 

"Lawmthu zawng zawng chu Pathian dik tak leh awmchhun Isua Krista hnenah ka hlan a ni," a ti a, boxer danglam leh lawm hlawh hian a hnehna chan chu a Pathian vang niah a ngai. 

Wilder leh Fury-te hi December 2018 khan an lo intawng tawh a, chak zawk an awm loh avangin nimin khan rematch hi an nei - nimina an inhnek hma hian contract-ah a vawi thum nana an inhnek leh theihna dan ziah tel a ni. 

Fury chuan Wilder hi tum leh ngei a duh thu a sawi a, "Mi huaisen tak a ni a, a lo kir leh hun ka lo nghak reng ang," a ti a, Las Vegas-a mipui 70,000 lenna Allegiant Stadium chu inhmachhawn leh nana a hmun duh a nih thu a sawi tel bawk. 

Inhnek zawh hnua damdawi in panpui Wilder hian Fury hi a hnek nawn leh duh kher ang em? tih chu zawhna awm a ni a, a tlawm dan en chuan American fighter hian a cho nawn loh ringtu an tam zawk - Anthony Joshua hming pawh a ri ring hle. 

Boxer chak phu zawkin hnehna a chang a ni. Mahse, ka team-te khan towel kha rawn theh lut kher lo se ka ti a, a tawp thleng bei turin ka inpeih sa a ni. Engmah chhuanlam tur ka nei lo a, Fury khan a khel ṭha em a ni. Mahse, kei chu pasalṭha ka ni a, tun aia ṭha zawkin ka lo kir leh ang. 

- Deontay Wilder

Deontay Wilder khan fak a phu takzet. He hmunah hian lokalin champion a nih ang takin a khel a, pasalṭha dik tak a ni. A lo kir leh ang a, champion a ni leh em em ang. 

Ka Lalṭhutthleng chu ka luah leh ang tiin vawi tam ka sawi tawh. Gym-ah inti hlim turin ka awm mai mai lo a, Wilder leh a team-te hnenah pawh knockout ka tum thu ka hrilh a ni. Kan vanglai hun hmang ve ve kan ni a, Tyson Fury ṭhat lai ber a tawng a ni. 

- Tyson Fury