Larsap leh CM

Mizoram Larsap chuan tun hnai khan sorkar laipuia mi pawimawh hrang hrang a kawm a, Home Minister hnenah state hmasawnna tur thu pawimawh tam tak a thlen a, Civil Aviation Minister hnenah Lengpui Airport tihchangtlun dan turte a sawipui. Mizoram Chief Mi­nister pawhin tun hnaiah sorkar laipui mi pawimawh hrang hrang kawmin Civil Aviation Minister hnen­ah Lengpui Airport tihhmasawn dan turte a thlen bawk. 

Tun hnaiah kan state hotu lu pahnihin sorkar laipui mi pawimawhte an kawm a, state tana ṭhahnemngai taka hma an la hi a lawmawm takzet a ni. Kan Larsap thu thlente hi a hrawl hlawm hle mai a, Mizorama AIMS din, Aizawl-Silchar kawngpui four lane-a siam, Lawngtlai leh Bangladesh khawpui Dhaka inkalpawhna siam, Mizorama IIM leh IIT dinte a tel. 

Larsapin Lengpui Airport tihchangtlun a, international airport-a siam dan tur a sawipuite leh Lengpui-Delhi direct flight neih a ṭul thu a sawite hi a tak chang thei se a duhawm ngawt mai. Kan Larsap thu ken zawng zawng mai hi state sorkar tih ni se hahipa kan sawi zui tur a ni a, a tak la chang chiah lo mah se hetiang taka ke a pen hi a lawmawm takzet a ni. 

Kan Chief Minister pawh a duai lo. Sorkar laipui dawrin vawi eng emaw zat a feh chhuak ta a, a hlawh­tlin chang leh thil hawn lian tham a neih loh changte awm bawk mah se, Mizoram hmasawnna tura theihtawp chhuaha a pen chhuak ṭhin hi a chhuanawm hle.

Kan state hotu lian pahnihin sorkar laipui an dawr a, thu pawi­mawh ṭhahnem tak an sawite hian rah ṭha chhuah ngei rawh se.