China rama hrileng vangin mi pakua an thi tawh WHO-in emergency meeting a ko
China National Health Commission chuan an rama coronavirus thar, 2019-nCoV tia sawi leng vanga thi chu nimin thleng khan mi pakua an tling tawh tih sawiin, he hri vei hriatchian tawh chu mi 440 an tling tawh bawk tih a sawi.
Thawhlehni khan hri vei zat hi mi 300 chuang nia sawi anih hnuah, nimin khan mi 440 an tling tawh tih sawichian a ni. Commission vice minister Li Bin chuan he hrileng hmuhchhuah ṭanna, Wuhan khawpuiah chuan ran lakluh phal a ni tawh lo tih a sawi.
Tun thla tir lamah Wuhan-a hrileng an hmuh enfiah tura kal zinga mi, Beijing-a Peking University First Hospital-a Department of Pulmonary Medicen head, Wang Guangfa pawhin coronavirus thar leng hi a kai tel tih a sawi. Mahse Wang chuan a dinhmun a ṭha tih a sawi nghal bawk.
Hri leng mek lo chhuahna bul tak hi hriatchian la ni lo a, scientist-ten an la zirchiang mek. China chuan he hri leng hi mihringin an inkaichhawn thei niin a sawi a, mahse hei pawh hi a la nemnghet chuang lo.
He hri leng mek hi China-ah chauh ni loin United States, Taiwan, Thailand, Japan leh South Korea-ahte hmuh a ni tawh bawk a ni.
China thuneitute chuan mipuite hnenah Wuhan city-a zin lo turin a chah. He khawpuia cheng mi maktaduai 11-te pawh mipui punkhawmna hmunte pehhel hram hram turin a chah a, vantlang punkhawm pawh a tlem thei ang buatsaih turin a ngen.
WHO-in emergencymeeting ko
China rama hrileng chu an ram pawn lamahte a darh zel avangin World Health Organization (WHO) chuan SARS-like virus leng mek chungchang sawiho turin nimin khan emergency meeting a ko.
China rama hri leng mek hi Severe Acute Respiratory Syndrome (SARS) nena inzawmna neia hriat a nih avangin mipui a tichiaiin ngaihven a hlawh zui hle. SARS hi kum 2002 khan China chhim lamah lengin, Hong Kong leh ram dangahte a darh zui a, mi sing telin he hri hi kaiin, mi 800 chuangin an lo thihphah tawh bawk.
Nimin khan WHO emergency panel-te chu Geneva-ah inhmukhawmin, China rama hri leng mek avang chuan khawvel pum huapa 'public health emergency' puan tur a ni em tihte an ngaihtuah a ni.