Chaltlang thlàn chhâwng CM-in a hawng

Chaltlang khawtlangin ruang zalh (phûm)-na tura thlàn chhâwng an siam chu February 22, Inrinni khan chief minister Zoramthanga'n a hawng. Thlàn hi RCC building-a siam niin, thlan tur lei laih a ngaih lohna turin a chhâwnga siam a ni a, Mizo­ram­ah a hmasa ber nia hriat a ni.

CM Zoramthanga chuan, Chaltlang khawtlangin mitthi phûmna tur ruahmanna thar siama an puitlin ta chu lawmawm a tih thu sawiin, "Mi kan pung zel a, khawpuia chêng kan pung zel bawk. Mitthi kan pun belh zel a, ram a ṭhang ve si lo a, ruahtui tam bawk nen, kan leite a nghet loin, thlànmual minte a tam phah hle. Heng zawng zawng avang hian mitthi inphûm dan kalphungah ngaihtuahna thar kan neih a pawimawh a ni," a ti a; mitthi invui danah pawh ngaihtuahna thar hman ṭha a tih thu a sawi. 

Thlân thar hawnnaah hian chief secretary Lalnunmawia Chuaungo, Aizawl Municipal Corporation (AMC) a deputy mayor Lalrintluanga, Central YMA president Van­lal­ruata leh Chaltlang Local Council chairman RC Vanlal­hlim­chhana te pawhin thu an sawi.

Chaltlang thlân chhawr­dawh hi Chaltlang YMA hma­laknaa siam a ni a, a siamna atana sum ruahman Rs. 29,73,000 zinga Rs. 3,00,000 chu Chaltlang YMA chhiatni ṭhatni fund aṭanga hman niin, a bâk zawng Rs. 26,73,000 chu Urban Development & Poverty Alleviation depart­ment-in  a tumsak. January 24, 2019-ah in sakna tur hmun laih ṭan a ni a, October 26, 2019-ah siam zawh a ni.

Thlân in hi chhâwng nga a ni a, chhâwng tinah thlàn 27 dah niin, thlan 135 a awm a; a chhaka thlân 28 an siam belh nen a vaiin thlân 163 a awm. Thlan hnuaiah ft. 3X3-a zau leh thûk lei laih khuar a ni a, chutah chuan lei mê chhûng khatin, mitthi aṭanga tui chhuak híp kang thei tura ngaih a ni. Thlan malte chu pipe hmangin lei laih khuar nen zawm vek a ni bawk.