MJA-in Mamita sorkar hnathawh an en

Mizoram Journalist Asso­ciation (MJA) General Head­quarters hruaitute chuan an president Zonunsanga Khiangte hoin nimin khan Mamita MJA member-te nen Mamit leh Phaizau khua inkar kawng PMGSY hmanga laih leh Mamit châwmtu tui lakna Phaizau PHE Pump House an tlawh a; NABARD sum hmanga Mamit khawpui tana Tut lui lakna tur an en nghal bawk.

PWD hotute sawi danin, Mamit leh Phaizau inkar kawng siam nan PMGSY aṭangin cheng nuai 1314.97 ruahman niin, km. 10.480-a thui laih tur a ni a, kawng laih (formation cutting) bik chu 95% zawh a ni tawh. Kawng siam enfiahtu MJA hruaitute chuan, hnathawh tawh chin chu ṭha thawkhata an hriat thu an sawi.

Mamit khawpui châwm tura Tut lui tui lâkna, Mamit Greater Water Supply Scheme Phase-1 chu NABARD sum nuai 670 hmanga siam a ni a, Tut lui aṭanga Phaizau PHE Pump House inkar siamna tur a ni. December 13, 2019-ah hna thawh ṭan a ni a, thla 14 chhunga zawh tura ruahman a ni.

MJA president Zonun­sanga Khiangte hi treasurer C Lalhmachhuana leh secretary pahnih Lal Rinmawia leh Lalnunzira Chawngthu ten an ṭawiawm a; Phaizau kawng leh PHE tui lâkna an ennaah hian Mamit MJA member-te bakah, Mamita IPRO Paul Rokima, PHE executive engineer Lalzawmliana leh PWD junior engineer VL Hruaia ten an ṭawiawm bawk.