Kerala sorkarin press mite hamṭhatna a pe ṭha

Press Study Tour hmanga Kerala-a thang mek Mizoram Journalists' Association (MJA) member-te leh IPRO-te chuan February 20, 2020 khan Kerala sorkara IPR department hotute an kâwm a; kum 1993 aṭangin Journalist Welfare Pension Scheme an kalpui tawh thu an lo hrilh.

MJA member-te hian Ningani chawhnu khan Kerala Secretariat tlawhin, Kerala sorkara Informaton & Public Relations (IPR) director UV Jose leh officer dangte an kâwm a; Kerala-a journalist-te dinhmun leh an hamṭhatna atana Kerala sorkarin hma a lak dante an zawt a ni.

Kerala IPR department hotute sawi danin, kum 1993 aṭangin Journalist Welfare Pension Scheme an kalpui tawh a; chu scheme-ah chuan journalist-te'n thla khatah Rs. 300 zel pension atan an thawh ṭhin. Journalist-te chu hlâwm (category) pathumah ṭhenin, pension hamṭhatna chu category a zirin Rs. 10,000-te a ni. Family pension an nei bawk a; family pension chu hlawm pali-ah an ṭhen ve thung a, category azirin Rs. 5,000, Rs. 4,000, Rs. 2250 leh Rs. 1,000-te a ni

Kerala state-ah accredited journalist 921 an awm a, accredited journalist-te chu Kerala State Road Transport Corporation (KSRTC) bus-ah a thlâwnin an chuang thei a, rél chuan man pawh a zatve chiah chawi­tir an ni. Kum khatah journalist-te tan Health Insurance Scheme atan cheng nuai 25 dah a ni a; journalist-te pualin sorkarin housing subsidy Rs. 1,00,000 a pe ṭhin a, chu chu Rs. 1,50,000-ah tihsan tum mek a ni bawk.

MJA member-te hian nimin khan Thiruvananthapuram aṭanga km. 117-a hlá Mavelikkara-a awm, Beekeeping Consortium and Training Centre (BCTC), Kerala State Horticulture Products Corporation (Horticorp) enkawl chu an tlawh a, Horticorp managing director J Saji leh a thawhpuite'n an lo dawngsawng.

BCTC hi khuai khawi zir nan leh research beih nana hman niin, kum khat chhungin khuai khawi zir mi 3,000 vel an awm ṭhin a; khuai khawitute'n an khawizu tharte chu BCTC-ah hian kg. khat Rs. 13-in an sawngbawltir ṭhin. Khuai chi hrang hrang ṭhahnem tak an khawi bawk.

Press Study Tour-a kalte hi Aizawl leh district hrang hranga MJA member pakua an ni a, IPR deputy director PB Lianthangpuii leh IPRO K Saitluanga ten an ho a ni.