SPMRM kalpui ṭan champha lawm a ni

Nimin khan Aibawk Rural Development (RD) Block chhunga khaw 11-a village council (VC) member-te tan Aibawk BDO pisaah Shyama Prasad Mukherjee Rurban Mission (SPMRM) kalpui ṭan champha vawi lina lawm a ni a, SPMRM chungchang inhrilhfiah nghal a ni.

Aibawk BDO Remlal­liana Hnamte chuan, SPMRM chu critical gap funding (CGF) aṭanga kalpui a nih thu sawiin, "Line department, central scheme leh state scheme-te'n an hnathawhah full capacity an pek theih loh âwl (gap) awmho kha SPMRM hian a phuhru dawn a ni," a ti.

Remlalliana Hnamte chuan, Mizoramah Aibawk block, Khawzawl block, East Lungdar block leh Thingsulthliah block-te chu SPMRM kalpuina tura thlan a nih thu sawiin, "Thing­tlang aṭanga khawpuia pém tam lutuk tihtlemna tura RD block-te tihhmasawnna tura hmalakna tur a ni," a ti a; sorkar department hrang hrangte'n RD block chhunga hmasawnna hna an thawhte a hlawhtlin lehzual theih nan SPMRM ruahman a nih thu a sawi.

Aibawk RD block chhungah hian khaw 11 - Aibawk, Falkawn, Muallungthu, Melriat, Tachhip, Sateek, Phulpui, Maubuang, Ṭhiak, Sumsuih leh Kelsih-te chu SPMRM kalpuina tura thlan a ni a; khaw 11-a V/C-te chuan beneficiary tur an thlante chu SPMRM line department leh sorkar scheme-te kaltlangin ran vulh tur vawk 52, bawng 10 leh ar 1,600 pek an ni.

SPMRM hnuaiah hian tuihâwk luankawr khuhna km. 1.5, kea kalna (footh­path) metre 700, khaw chhung kawng km. 7, step metre 165, cycling track km. 2, Mizo hmun hlui chei ṭhat, Herhse bonsai training, eco estate leh nature trail siam leh inzirtirna hun hman  ṭhin a ni. Chu'ng atan chuan SPMRM aṭangin cheng nuai 361.29 leh line department aṭangin cheng nuai 161.98, a vaiin cheng nuai 523.275 hmuh a ni tawh.

SPMRM hnuaia hnathawh dan tur ruahman lâwk aṭanga hnathawh tawh dan tlangpui chu - Aibawk RD Block (phase-I) hnuaiah 70%, Thingsulthliah RD Block (phase-II) hnuaiah 40%, East Lungdar RD Block (phase-III) hnuaiah 20% leh Khawzawl RD Block (Phase-III) hnuaiah 20% thawh zawh tawh a ni.