Organic farming uar a nih theih nan Theihtawp kan chhuah - CM Zorama

Chief minister Zoramthanga chuan, Mizoramah chemical fertilizer (leiṭha) hman tlem a, organic farming uar a nih theih nan theihtawp an chhuah tih a sawi a, "Project lian siamin kan buaipui nasa," a ti.

MNF member Dr Vanlal-ṭanpuia'n Agriculture minister C Lalrinsanga a zawhna kal zelah Chief Minister chuan, chemical fertilizer leh pesticide chemical a ṭha lo tih khawvelin a hriat thu a sawi a, "Hengte hi pumpelh turin khawvelin hma a la a, keini pawhin hma kan la, kan bei nasa tawh khawp mai," a ti a; bio-chemical duh anga hmuh tam theih a nih loh avangin hmalak a harsat thu a sawi.

Zoramthanga chuan, organic farming uar zawka kalpui a nih theih dan tur an ngaihtuah nasat thu sawiin, "Kei ngei pawhin company-te ka dawr nasa. Bio-chemical hi a concentrated form leh liquid form-in an nei a, a senso pawh chemical fertilizer nen a inang tlangpui thu an sawi. Kum khatah vawi 3/4 kah a ngaih tur thu an sawi a, an sawi dan a ni a, a ṭha dawn em chu ka hre lo," a ti.

Chief Minister chuan, chemical fertilizer hmanga huan/leilet cheibàwl tawhte chu organic lama thlâk turin kum 3/4 vel enkawl a ngaih tur thu company lamin an sawi nia tarlangin, "Thlai chìnna hmun chemical-in kan ti nasa a, organic-a thlak a ngai," a ti a; leilet chu a zauh tham deuh avangin organic-a thlak a harsat deuh thu a sawi.

Chemical-a la enkawl loh ramte chu organic hmanga enkawl tura hma an lak thu sawiin CM Zorama chuan, "Project lian kan siam a, kan buaipui nasa. Chemical-a la enkawl ramte chu organic hmanga enkawlin, organic hmanga enkawl thlai zawrhna bik kan siam ang. A man to deuh mah se, organic hmanga enkawl ngei a ni tih mipuite'n an hriat chuan an duh thoin a rinawm," a ti.

ZPM Legislature Party leader Lalduhoma'n Mizoram chan tur chemical fertilizer-te chu a zuartu (dealer)-te'n ram páwnah an hralh ṭhin tih a sawi chung­changah Chief Minister chuan, "Hei hi dan kan tum ang. Chemical fertilizer hi rua tan chuan a pawi miah lo a, tam tak kan mamawh dawn a ni," a ti a, Mizoramin raw hmun atan DDT a mamawh tam dawn thu a sawi.

Lalduhoma chuan chemical fertilizer supply turin sorkar aṭanga phalna nei dealer an awm thu sawiin, "Sorkar laipui­in chemical fertilizer-te tlâwm zawka kan lei theihna tur dealer kaltlangin an ruahman a, dealer-te'n an awmna district-ah an hralh tur a ni. Chutiang a nih lai chuan, khawi khuaah mah lei tur awm loin tawlhrûk vek a ni a, kan puala lo kal hi kan chang lo," a ti.

Agriculture minister C Lal­rinsanga chuan, MNF sorkar hmasak laiin dealer awm tho mah se, an sorkar leh hnuah dealer an pun vak thu sawiin, "Guwahati aṭangin an la a, loneitute hnenah a thleng lo tih hi a dikna chen a awm. Myanmar-ah a lut niin a lang," a ti a; minister a nih hlima dilna lut hnem ber chu chemical fertilizer dealer nih dilna a nih thu a sawi.