BJP-in ILP ṭhiah an tum ngei dawn - Lal Thanhawla

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-a political session-ah thu sawiin, BJP kaihhruai sorkar laipuiin Inner Line Permit (ILP) ṭhiah an tum ngei dawn niin a sawi.

Lal Thanhawla chuan, ILP chu BJP-in hnawk an ti hle nia sawiin, "BJP hian ILP hi ṭhiah an tum ngei ngei dawn a ni tih hi zawlnei pawh ni lo mah ila ka sawi ngam. India mi tam takin hnawk an tih em em ILP hi innghahna atana hman tlak a ni lo thuai dawn," a ti.

Congress party President chuan, "BJP sorkarin Hindu lal ram din an tumna kal zelah hian an hmachhawp tam tak an tihlawhtling tawh a, an duh anga min khawih ve theih lohna, min hung biktu ILP hi hnawk an ti em em a ni," tiin, BJP sorkarin ILP chu paih ngei tuma hma an lak leh ngei dawn thu a sawi a ni.