Sakhaw zalenna duhna resolution pawm 'BJP' tih chu 'Central sorkar' tia thlak a ni MNF-in BJP an hlau - Zodintluanga

Zodintluanga resolution hi MNF member Lawmawma Tochhawng chuan tihdanglam a rawt a, a rawtna ang chuan 'resolution amendment' chu an pawm ta zawk a ni. Resolution sawihonaah resolution pu luttu Zodintluanga chuan MNF-te chu BJP hlauah a puh a; chief minister Zoramthanga chuan, MNF-in BJP an hlauh loh thu a sawi thung.

Chief Minister chuan, resolution pahnih chu a inang lo hle tih sawiin, "Pakhat chuan BJP chiah a kâwk a, pakhat chuan sorkar ding tur zawng zawng a huam. BJP hi keini pawhin ṭha kan ti lo. Hindutva pawh ṭha kan ti lo, kan do zel dawn. Anni chauh hi ṭha lo kan ti lo. India ram Kristiante tana khawlpui lian ber min petu, kan pastor-te hnawk tih ber chu Anti Conversion Law a ni. Hei hi Nehru-a te tih, Congress hun laiin a ni. Kristiante tana ṭha lo hi BJP-ah pawh an pass, Janata-ah pawh an pass a, a dik lo rêng rêng. Congress-ah an pass tam ber," a ti.

Sakhaw zalenna an duh thu sawiin Zoramthanga chuan, "Sakhaw zalenna hi duh mah ila, state-in a tih theih chin a awm. Keini 'Pathian leh kan ram tan' titute chuan tih tak zetin kan do zel dawn. Tunah BJP in hlau in ti a, BJP kan hlau lo, Congress pawh, Janata pawh. Congress pawh ni rawh se, Janata Dal, BJP ni rawh se, India rama kan tel dawn chuan sakhaw zalenna a awm tur a ni," a ti

CAB chungchang sawiin Chief Minister chuan, "CAB kan do a, in pass lui dawn a nih chuan Mizoram tel lohna a ni tur a ni kan ti. Mizoram a tel lohna turin kan vote, tel dawn se kan duh lo. CAB dodalna huaisen taka aupui chu Pu Zoramthanga chiah a ni, an ti. Thil danga inpuh kual chi a ni lo... Kan resolution hi a theuneu em mai, a aia chakin i ti ang u. Congress pawh Janata Dal pawh, sorkarna in siam chuan sakhaw zalenna a awm tur a ni tih kan duh," a ti. 

CLP leader Zodintluanga chuan, a resolution chu member zawng zawngin ṭha an tia a hriat thu sawiin, "An duh lohna ber chu BJP chauh tih a ni. BJP sorkar kan tih chhan chu BJP kan hrawn mek a, nakina lo kal zel turte chu tih a ngai kher lo. Kan duh leh nakinah resolution dang pawhin kan ûm mai ang. BJP sorkar hlauhna tur a awm lo, ngati nge kan hlauh em em," a ti a; MNF member zingah BJP-in Kristian sakhua a tihduhdahna lam pahnih chiahin an sawi ngam thu a sawi. 

Zodintluanga chuan, la sorkar tur thlengin House Leader-in a hlau nia sawiin, "Kum khat leh thla hnih chhungin central sorkarin a vaw dûp hle tih a chiang. Pu Speaker, i dinglama ṭhute hian BJP sawi an hlau. Member pakhatin, 'India rama Hindu firfiakte'n Kristiante an tihduhdah a awm ti zawnga a sawi kha ka rilru a na khawp mai. BJP hlauhna vang maia resolution amendment siam ni lul suh se. Central sorkar hlauhna tur a awm lo, Finance Commission-in state-te chan tur sum a ruahman tho," a ti.

Resolution tihdanglam rawttu Lawmawma Tochhawng chuan, central-ah Congress, Janata Dal leh BJP kaihhruaina hnuaiah Kristiante tihduhdahna a thlen vek thu sawiin, "Congress an sorkar rei avangin an hun chhungin sakhaw tihduhdahna a thleng tam ber. Tu party mah fakin kan dem bik lo. Party pakhatin ro an rêl reng lo," a ti a; tu pawh central-ah sorkar se, sakhaw zalenna humhim a nih zel theih nan chak taka hmalak an duh thu a sawi.

Opposition group lea­der Lalduhoma chuan, "Develop­ment-ah kan chak lo ang, kan project min approve sak duh lo ang tih mai mai avangin kan ram, hnam leh sakhua hi i hralh lo ang u. Kan thusawi chu eng pawh lo ni rawh se, kan thil tih hi a ni pawimawh ṭhin. Chuvangin, BJP tih tel ngeia pass hi ka thláwp e," a ti.