3rd IR hmun tur 96% siam zo tawh

Indian Reserved (IR) police third battalion headquarters tur Thingkah ram, Lawng­tlai district-a siam mek chu hna thawh tur zinga 96% thawh zawh a ni tawh. IR hmun siam nan hian cheng nuai 2842.28 ruahman a ni.

Mizoram IR 3rd battalion hmun tur siam hna hi North East Consultancy Service (NECS)-in an thawk a, nimin khan Lawngtlai district MJA member-te'n an president Lalngheta Ralte hoin an tlawh a, hna thawh dan an enfiah.

NECS hotute'n Lawngtlai MJA-te an hrilh danin, December 2014-ah IR 3rd battalion hmun tur siam hna thawh ṭan a ni a, tun dinhmunah 96% thawk zo tawhin, tunlai hian in an sakte rawng hnawih mek niin, hna thawh tur zawng zawng chu kumin March thla chhungin zawh hman an inbeisei. In 42 sak a ni a, chu'ng zinga paruk chu duty post a ni.

Lawngtlai district MJA-te chuan, Lawng­tlai district-a hmasawnna hna thawhte chu a theih ang anga vilzui an tum thu sawiin, 3rd IR hmun tur siam mek chu July 5, 2019-ah pawh an lo enfiah tawh thu an sawi a; an tlawh hmasak ṭuma an duhkhawp loh lai an sawite ṭha taka siam zui a ni chu lawmawm an tih thu an sawi bawk.