Mizoram Health Care Scheme chu kalpui tan a ni ta a, Mizoram sorkar ruahmanna Health Care Scheme hi sorlar laipui ruahmanna RSBY nen  kalkawptir a ni.

MNF-in sorkarna an chan laiin Mizoramah Health Care Scheme hi kalpui tan a ni a, mirethei tam takin an chhawr a, nunna hlu tak pawh a chhan hial ang. Health Care Scheme hrim hrim hi thil tha tak a ni a; nimahsela keini ang state tan chuan kalpui huphurhawm tak a ni tel a, sorkar hmasaah pawh he rawtna tha tak kalpui dan hi a fel tawk lo a, a tawp lamah an buai ta hle a ni.

Congress kaih­hruai sorkar a ding a, Health Care Scheme thar thawh a tum a; nimahsela tun hmaa kalpui tawh dante zir chiangin a fuh tawk lote an siam tha a, ruahmanna thar an siam niin a lang. Tuna ruahmanna thar kalpui hi a bul an tan chiah a, a rah chhuah tur a hriat loh a, Mizo mipuite tana tangkai taka kalpui theih ni se a tha ngawt mai.

Mizote hi kan la retheih vang pawh a ni ang a, damloh nikhuaa inenkawlna tur a hranpaa dah nachang hi kan hre mang lo. Tlema a nei nung deuh zingah pawh, hnam dangte anga damloh nikhuaa hman tur a hranpaa sum dah hrang hi kan la tlem hle. Hei vang hian damloh hunah kan buai a, sorkar-a MR bill theih hram dan zawng vek mai kan ni. Sorkarin mirethei, sorkar hnathawk ve lem lote harsatna hriain Health Care Scheme a duang a, hei hi dik tak leh tangkai taka hman i tum ang u.

Health Care Scheme-a dik lo taka hlawkna lo zawng official lam emaw, dik lo taka bill tum damlo lam emaw an awm a nih chuan sorkarin khauh takin action la se; mi tam takin rinhlelhna mita an thlir Health Care Scheme hi hlawhtling taka kalpui tumin tan i la ang u.

Sorkar kum kal taa Treasury lamin an pass hman loh, cheng vaibelchhe 70 vel zinga cheng vaibelchhe 42 vel chu hmuh kir theih a beiseiawm loh thu Finance leh Planning department atangin press mite'n thu an dawng.

Mizoram sorkarin a hun taka sum a hman loh, cheng vai­belchhe 70 chuang a lapse chungchang khan sawi a hlawh a, mi tam takin a luangral mai dawna an hriat avangin an ui hle a ni. Ni­mahsela Chief Minister meuhin Assembly House zahawm takah sum lapse-te hi hmuh kir leh theih a nih thu a sawi a, an hmuh kir tur chin erawh a tlem hle niin a lang ta.

Sum tam tham tak a lapse dawn tih a hriatin Chief Minister a lungawi lo a, sorkar hnathawk thenkhatin sorkar kum tawp dawnah eng emaw beisei vanga a hun taka tifel duh lohah a ngai a, thil tidik lotu an awm a nih chuan dim an nih loh tur thu thlengin a sawi. Chief Minister thusawi ang hian, cheng vaibelchhe 70 chuang zet hman loha a awm hi chu a dik lo takzet a, tute emaw chunga hremna lekkawh miah loa ngawih liam pui mai mai chi niin a lang lo.

Tunah a tak ram a lo lang tan a, sorkar sum vaibelchhe 40 chuang kan chân hlen dawn niin a ngaih theih ta a, a uiawm takzet a ni. He thilah hian mawhphurtu an awm lo thei lo a, mawhphurtu chu an lo tam deuh a nih pawhin hrem tur an tam deuh a ni mai a, sorkar pawisa hetiang maia riraltirtu hi chu an awm ngei tur a ni. Sorkar hnathawk mawhphurtu an awm a nih chuan sorkar thuneitu lam hian koin thil awm dan sawifiah ngei se, heti zat zat riral ringawt tura alang hi a uiawm piah lamah kan state dinhmun enin a thinurthlak tel hial a ni.

Tun hnaia ni tin chanchinbu pakhatin, ‘Minister hnenah file táng rei’ tia a tarlan chungchang chu sorkar thuchhuah hmangin an sawifiah a, GAWSS Phase-II chungchangah PHE Minister-ah file táng a awm loh thu sorkarin thu an chhuah.

Sorkarin chan­chinbua thuziakte a ngai pawimawh a ni tih hriat hi a lawmawm a, hei hian chanchinbute pawh a tiphûrin thahnemngai zawka thawk turin a fuih thei hial ang. Sorkar hmasa hunlai khan Politician langsar tak pakhat chuan chanchinbu chhiar a peih tawh loh thute a sawi chhuak a, a vanduaithlak takzet a ni.

Thawk khatlai khan chanchinbute hian sorkar thil tih dik loh te, contract hna fel lote leh thil dik lo nia lang tam tak an hai lang a; nimahsela sorkar lamin heng thilte avang hian tumah a hrem lo a, a ziaktu chanchinbuin tute emaw huat an hlawh phah lek a. Tun hnaiah sorkarin chanchinbua thuziakte a ngai pawimawh thar ta hi hmasawnna lawmawm tak a ni.

Hei vang hian PHE Minister insawifiahna hi 100% in a dik vek e, tihna a ni kher lo. He mi chungchangah hi chuan chanchinbu lamin an hmuh dan an ziak a, Minister-in anmahni thlirna lam atanga thil awm dan sorkar thuchhuah kaltlangin a sawifiah ve thung. Pakhatin file a tâng rei niin a puh a, a puha-te hi an rawn insawifiah nghal zat bawk a ni.

Minister an ni emaw, Chief Minister hial pawh nise vantlang hriata an department-a thil fel lo awm nia lang puan chhuah tawhte hi chu an ngaihven zui tur a ni a, engah maha ngai lo ang maia ngawih san emaw, tawngkam bung taka chhân lêt ringawt hi a tawk lo. PHE Minister-in amah an puhnate zahawm takin a chhâng a, hetiang hian Minister dangte leh Chief Minister pawhin chanchinbua inziakte hi ngaihven zui zel rawh se.

Mizoram Food and Allied Industries Corporation (MIFCO) Ltd.-a thawkte chuan, thla sarih chhung hlawh an lak tawh loh avangin September 1 atang khan tiamchin awm loin office an kal tawh lo.

MIFCO din zet a, hlawkna neih chu sawi loh a thawktute hlawh takngial pawh an pe thei lo hi a zahthlak a, a mualphothlak a, ngun taka chhût chuan a thinurthlak thei hial a ni. MIFCO hi sorkarin kuthnathawktute tana a din a ni a, kut­hnathawktu then­khatin an chhawr ngei mai a, nimahsela hlawkna nei miah loa heti chen a kal hi a pawi a, a tawpah thawktute'n an tuar ta a ni.

MIFCO tlak chhiat chungchangah hian MNF leh Congress-in mawh an phur ve ve a, sorkar hmasa a ni emaw, sorkar tharah pawh MIFCO hian ngaih pawimawh a hlawh tawk lo tih a lang. Chumi piah lamah chuan MIFCO din a nih dawnin ruahmanna fing leh fel tak an nei thui tawk lo tih pawh a lang a; hetiang tiat corporation din ve zet a, sorkar puihna pawha mahni intungnung zo lo a, hlawk ahneka hloh char chara a kal hi chu ngaihtuah nawn a ngai a ni.

MIFCO hi hloh zelin kal mah se, a hlawkna teltu chu kuthnathawktute an nih tho avangin an ngaidam thei deuh a ni mai thei a; amaherawhchu kuthnathawktute tan pawha belh tak tak tlak chiah mang si lo, sorkar tana hlawkna hmuh tur awm bawk si loa dah reng chi niin a lang lo.

MIFCO hi vawi leh khata tihtawp mai chi a ni lo a, a hnuaia thawktute hmalam hun thlirin awmze nei taka enkawl a ngai tih a chiang. Tuna an inenkawl dan ringawt hi chuan rah tha a chhuah lo tih a lang tawh a, kalphung thara kal turin ruahmanna thar neih a hun. Tunah hian sorkarin thawktute hlawh tur hi ngaihtuahsak ringawt pawh ni se, nakin zela an kalna turah engtia kaltir zel nge a tum, tih hi hriat chian hmasak a tul hle a ni.

MIFCO din dan leh an din chhante chu tha hle mah se, tun hnua a thawktu chhungkaw tam tak eizawnna tibuaitua a tang ta mai hi a vanduaithlak hle a ni. A chhawrtu tura tih kuthnathawktute tana innghah ngamna tak tak ni lo, a ngheta thawktute hlawh pawh pe thei loa dah ringawt chi a ni lo a, sorkar hian MIFCO khai chhuah dan emaw, sawi danglam dan emaw, eng emaw kawng tala siam that dan chu a ngaihtuah a ngai.

Food, Civil Supplies & Consumer Affairs Minister H.Rohluna chuan, tun hnai khan Vairengte-a Supply department chechgate a hmunah a tlawh a, gate duty-te chu Mizorram supply phurtute tana harsatna siam lo turin a hrilh.

Supply Minister hian Mizo­ramah mipui nitin ma­mawh thilte tha taka a lo luh a, dan ang taka kalpui a nih theihna turin a thawkrim hle mai a, a hnathawh pawhin rah tha a chhuah mek zel. Food, Civil Supplies & Consumer Affairs department hi mi­puite nitin nun khawihtu an nih avangin an pawimawh em em a, Minister viak tha leh taima tak an nei hi a lawmawm hle a ni.

Minister hian Mizoramah buhfai tihchingpen a nasa tih a hria a, tihtawp tuma a tan laknaah hian harsatna tam tak a tawk ngei ang. Buhfai phurh leh hralh chungchang hi hun rei tak chhung dan lo anga kalpui a lo ni tawh a, a dik loa kalpui hi dan ang deuh hiala hman a ni tawh a; nimahsela hei hi mipuite chanvo chhuhsakna a ni tih hriaa Minister ngeiin a ring a rawlh ngam hi a fakawm hle a ni.

He Minister hian a thil tih tum hi a hautakzia hre chungin huaisen takin ke a pen ngam a, a tawp thlenga a tan ngam leh si loh chuan a thahnemngaihna hi a mualphopui lêt ve hlauh thei. Buhfai tichingpentu retailer-te chungah kut a thlak dawn a nih chuan anmahni party mi leh sate an ni nawk dawn a, dikna tana a tawp thlenga a din ngam a ngai ang. A department-a thawktute pawh thil ti dik lo chu dim a nih loh tur thu a sawi a, tute emaw chhungte pawh lo ni se a thusawia a din ngheh ngam a tul tawh ang.

Food, Civil Su­pplies & Consumer Affairs Minister hian Mizoram mipuite tan thahnem a ngai a, hna tha bul a tan tawh a, kawng laklawhah a kir san thiang tawh lo. Mipui nitin mamawh thilte dan ang taka tluang taka Mizoram a lo luh a, dan ang taka sem a nih theihna turin a tawp thlengin ding tlang ngam rawh se.

Mizoram Chief Minister hian NLUP hi hlawhtling ngei se a duh a, a thahnemngaih luatah NLUP a hlawhchham chuan Lal Isua tihmualpho a ni ang, tih lam hawiin a sawi thin. Tun hnaia Commonwealth Games-a lam turte thlahtu Art and Culture Minister pawhin, thalai rual lam turte chu Isua tihmingthaa tihmingchhe theitu an nih thu a chah.

Ram hruaitu lu ber berte'n Mizo mipuite an fuihna tawng­kam hi a mawi a, an thahnemngaihna pawh hi a fakawm a; nimahsela he­tiang taka sakhaw hminghmerh palai ang maia inchhâla infuih hi thil fing ber a ni lo palh thei. Mizote hi tawng khat hmang, sakhaw pakhat bia ni mah ila, kan biak dan chin leh kan sakhuaa kan ngheh dan chin pawh a inang lo a, sorkar policy pakhat a hlawhtlin loh vang emaw, ram hminga fehchhuakte an lo awm herh deuh vanga sakhua leh an biak Pathian ber mualpho tur anga sawi fo loh hi a tha zawk mai thei?

Sakhaw zalenna rama awm kan ni a, chumi zawn atanga thlir pawhin mipui vantlang hmaa a hnam anga a lian thama kan thiltih apiang Kristian sakhaw thil tih bik anga hmeh bel a, tihthata Kristian-te hmingthatna leh, tihchhiata Kristiante hmingchhiatna ang deuha chhuah hi a fuh ber lo ang. Zin chhuah nikhuaa hnam dang mit hmuha mawi tum hi a tha tehmeuh mai a, nimahsela hei chauh hi a tawk lo. Kan rama kan nun dan leh khawsak danah hian sakhaw mi ila, contract leh supply kan pek danah te, sorkar sum kan hman danah te, inthlan dawna kan campaign danah te, kan political party committee-a thil kan thlir dante hi sakhaw mi se, chu chu hnam dangte pawhin an hmuh hmaih hauh lo ang.

'Mizoramah chuan mipui hmaah politician-in sakhuana kaihhnawih an sawi nasa a, Pastor-in politics an sawi nasa' an tih fiamthu hi a dik thui ta hle. Heng thil pahnihte hi tha taka kal kawp thei a ni a; nimahsela awmze nei loa khawih pawlh erawh chuan a khawi zawkah mah thatpui mang si loa kal sualpui theih pawh a ni tel ang. Kan ram hruaitute'n sakhuana an ngaipawimawh a, an sawi fo hi a hnawk hauh lo a; nimahsela ram hruaitute leh a mipui nawlpui pawh hian, sakhaw mi kan nih lan chhuahtirna hun leh hmun tur hi kan thliar thiam a tha khawp mai.

Mizoram pumin ei rawng­bawlna gas-ah harsatna kan tawk mek. Sorkar hmunpui Aizawlah meuh pawh he harsatna hi a la lian hle a ni ang, veng tinah gas bur ruak thahnem tak intlara inchuh hmuh tur a la awm reng a ni. Gas chungchangah hi chuan, sorkar inthlak rualin harsatna kan tawk nghal a, MNF sorkar khan gas awlsamlai a tawng fuh a, Congress sorkar hian gas harsat hun a tawng fuh ta bik te a nih ngawt loh chuan, MNF sorkarlai aiin Congress sorkar hnuah cooking gas-ah harsatna kan tawk nasa tih hi chu phat chi a ni lem lo.

Tun hnaiah Civil Supply Minister chuan nasa takin tan a la a, company hotute a hmunah tlawhin, mipuiten gas-a harsatna an tawh mek tihziaawm dan kawng a dap a, company hotuten an lo dawnsawn dan atangin a hlawhtling dawn pawhin a lang a, minister thawhrimna hi a fakawm hle a ni.

LPG rawn hralhtu company-te ngaihdan chuan, Mizoramah hian gas connection hi, chhungkaw awm zat atanga chhutin a tam thawkhat a, gas cylinder an rawn thawn luh zat atanga chhut pawhin, heti lutuka harsa tur hi kan ni lem loin an ngai a ni. Chuti chunga kan harsat em em reng chhan hi, gas bur thawn luh tlem vang pawh ni ber loin, connection tam tham tak nei chhungkua an thathnem vang a ni mai thei. Chhungkaw thenkhat chuan connection sawm aia tam, double cylinder an nei fur a, eng emaw vanga harsatna a awm palh huna buai hauh lo turin chhungkaw thenkhat chuan bur 20 vel lai hman loha kawl an duh a, chu chuan mi dang lakah harsatna a thlen ve bawk niin a lang.

Gas connection tam tak neite hi dem ngawt hleih theih an ni bik lo. Khawsak hautak dan a inchen lo a, duh hun huna hmuh tur a awm bawk si lo a, a tam thei ang dah khawl a ngai ve bawk a ni. Bur thahnem tak dahthat kher ngai lo tura duh hun huna lak theih dan kawng siam a ngai a ni.

India rama khaw lian deuh chinah chuan, gas hi eirawng­bawlna atan hman deuh vek a ni. Mahse Mizoram anga gas inchuha intlar tulna khua hi sawi tur a vang viau. Mizoram a nih tak avanga intlara inchuh a ngai ta bik hi, gas bur rawn thawn luh tlem vang ai mahin, sem dan kalphung dik loh vang ni zawk mahin a lang. Mizoram aia a let 40 zeta mihring tamna Kolkata-ah pawh inchuh ngai lova an sem theih dan hi, hmuhchhuaha tih ve a har lem lo ang mawle.

Kum 40 dawn lai kaltaa Mizoramin UT a neih atang khan, tourism lama hmasawnna hi sawi rik a ni ve fo thin. Tun hnai deuhah phei chuan, sum hnar hlawk tak a nih theih thu uar taka sawi a ni. Ram dangah chuan tihdan an thiam vangin sum hai luhna hlawk takah an hmang a, Mizoramah erawh chuan sum neihsa ei raltu lian tak a la ni zel rih.

Mizorama sorkar hrang hrang ding tawhten, tourism tihhmasawn lam hi an la vei na tawk lo hlein a lang. State tam takah chuan, minister zinga viak tha leh chhuanvawr deuhten tourism department hi a malin an enkawl a, Mizoramah erawh chuan, department dang kara zakkep ang lekin sorkarin a la ngai niin a lang.  Sorkarin tourism lama a tih tawh chinte pawh, khualzinte hipna tur kawng zawn lam aiin, duhsak zawngte sum siamna remchang zawnna, contract hna siamna ang leka puh palh a la awl hle. Tunlai khawvela zin miten hmuh an chak ber ber chu, siamtu thilsiam, mihringin a la tihdanglam loh hmun tihbaiawm leh rualrem lo tak takte leh nungcha vang tak tak te a ni a, sum senga siam chawp ngai reng reng lo deuh hlir a ni. Mizoramah hian chutiang thil, khualzin hip thei chi chu tam tak a awm a, kan hmang tangkai lem lo a, kan tichingpen mek zawk a ni.

Tourism lama hmasawnna hian hnam nun a tidal thei tih te, thalaite tan sual kawng zawh tur a inhawng zau thei tihte hi insawithaihna langsar tak a ni. Ram rorel khawlin a zir phawt chuan, tourism hmasawnna hi hnam tan a hlauhawm lo a, hnam ralna a ni hek lo. Sum hnar lian ber atana tourism neihtu Israel te, Malaysia te, India ramah pawh Sikkim state-te hian, an tourism hi an dal phah lo a, an hlawkpui a, innghahna lian ber atan an hmang zawk a ni. Tourism hmasawnna atan ILP te hi a hnawk lo a, a tangkai thei viau zawk ang. Roreltuten tourism an ngaihtuah dan a dik  hunah, tourism chauh hmang pawh hian state hausa takah Mizoram hi a la chang thei ang.