2011 atangin India-ah Formula One intlansiak en theihin a awm maithei kan tihna a rei tawh a, tunah chuan he thu hi tih chian a ni tawh a, season lehah chuan India leilungah F1 intlansiak a taka en theihin a awm tawh tur thu Paris-a World Motor Sport Council thu khawm chuan Nilaini khan an puang.

India-ah hian Formula 1 Grand Prix hi October 30-ah neih a ni dawn a, season leh atang chuan F1 calendar-ah intlansiak 20 a awm tawh dawn tihna a ni.

Hetihlai hian Indian Grand Prix tlanna tur circuit hi siam mek ala ni a, FIA chuan he circuit an siam lai hi nakkum July 30 hma ngeia an peih fel hman a tul tur thu an sawi.

Indian Grand Prix tlanna tur hi Greater Noida (Delhi atanga kilometre 35) khaw pawn hreta awm a ni a, a track hi kilometre 5.14 a thui a ni. He circuit hi Noida-a hmun pui nei Jaypee Sports International (JPSI)-in an sa mek a, a intlansiakna track hi German racetrack designer Hermann Tilke-a design a ni a, Tilke hian Malaysia, Bahrain, China, Turkey, UAE leh South Korea track-te pawh a design tawh a ni.
JPSI vice-president Mark Hughes chuan India Grand Prix tlanna tur track hi F1 track zawng zawng zinga average speed that berna pawl a nih theih tur thu a sawi a, a beisei dan chuan pangngai taka tlanin lap khat tlanna'n minute 1 leh second 24 vel an hman a rin thu a sawi. He track-ah hian kawng ngil thui tak tak a awm bakah kawng kawi chi hrang hrang a awm ang a, a track-ah hian hmun sang deuh lai leh hniam deuh lai pawh a awm dawn a, Hughes chuan nakkum May 31-a an peih hman tur thu a sawi.

He track siamna'n hian dollar maktaduai 350 sen a ni dawn a, entu mipui nuai 1-1.2 vel an leng ang. He track hi F1 intlansiakna atan bik chauha serh hran a ni dawn lo a, a tul chuan MotoGP leh Superbike-te tan pawha tlan theih tura ruahman a ni.

Indian F1 driver Karun Chandhok pawh a phur tawh hle a, "Indian Grand Prix a awm chuan, mipui tam zawkin F1 chauh lo motorsport hrim hrim an ngaihhlut phah dawn a, thil lawmawm tak a ni. A bikin ka tan a phurawm zual hle a, a chhan chu intlansiak tura ka chhuah hunah intlansiak tan hmain Indian national anthem ka hria ang a, min tana authawm ri ruai ruai ka hre tur hian min ti phur tawh a ni," a ti.

Indian F1 driver hlui Narain Karthikeyan pawhin Noida-a F1 intlansiak hlan hi a nghakhlel hle a, "An thu puan hian min ti phurin ka hlim takzet a ni. In lama F1 itlansiak ngana tute tan India leilungah ngei Indian team intlansiak en hi a chakawm tawh ka ti," a ti.

Hughes-a sawi dan chuan F1 intlansiak en man hi mi vantlang tan pawha lei theih tura tlawma duan a ni dawn a, ticket hi nakkum January thla atangin an zuar chhuak tan ang.

Indian Grand Prix a awm tawh dawn avangin sawi tawh angin nakkum season atang chuan F1 calendar-ah intlansiak 20 a awm tawh dawn a, driver leh team-te an hah deuh ang.

La hma deuh mahse nakkuma intlansiak calendar kan han tarlang tel nghal bawk e.
March 13    :     Bahrain
March 27    :     Australia
April 10    :     Malaysia
April 17    :     China
May 8    :     Turkey
May 22    :     Spain
May 29    :     Monaco
June 12    :     Canada
June 26    :     Europe (Valencia)
July 10    :     Great Britain
July 24    :     Germany
July 31    :     Hungary
Aug 28    :     Belgium
Sept 11    :     Italy
Sept 25    :     Singapore
Oct 9    :     Japan
Oct 16    :     Korea
Oct 30    :     India
Nov 13    :     Abu Dhabi
Nov 27    :     Brazil

India leh Pakistan hi ram inhal a nih zia chu zep rual a ni lo a, mahse he ram inhal tak atang hian Rohan Bopana (India) leh Aisam-Ul-Haq Qureshi (Pakistan)-te chuan ATP tennis mens doubles team an din a, tun hnaiah an hlawhtlinga Nilaini khan US Open final an lut.

India leh Pakistan mipuite rilru hmunkhat pua an awm tum hi a tlem hle a, mahse US Open mens doubles finals an khelh hunah chuan he ram pahniha mipuite hi rilru hmun khat puin an awm dawn a, he doubles final Flushing Meadows-a khelh tur hi India leh Pakistan United Nations ambassador-te pawhin a hmuna ena thut dun an tum a ni.

India ambassador Hardeep Puri chuan, "Heihi sports a ni a, sports-in ram pahnih a phuar khawm theih zia kan hmu mek a ni," a ti.
Bopana leh Qureshi-te hian final-ah ATP mens doubles chanchina hlawhtling bera sawi ngam, doubles seeded number one Mike leh Bob Bryan-te an hmachhawn dawn a, an hmabak a ko hle.

An hming lema "Indo-Pak Express" an tih Bopana leh Qureshi-te hi 2003 atang khan an inkawp tan a, kumin kum tir atang khan an kawrah "Stop War, Start Tennis" tih inziak an ha tan a, ngaihven an hlawh phah hle.

Bopana leh Qureshi-te hian Argentine inkawp Eduardo Schwank leh Horacio Zeballos-te inkawp chu semifinal-ah 7-6 (5)  6-4 in an hneh a, champion turin vawi khat chak chiah an mamawh tawh. US Open hmaa Grand Slam-a an thlen san ber tum chu kumin Wimbledon kha a ni a, hetah hian quarterfinal an thleng a ni. Bopana leh Qureshi-te hian thla hmasa kha final-a an tum tur Bryan-te unau hi an lo hneh tawh a, heivang hian chak lo chiang saa dah ngawt theih an ni bik lo.

Qureshi chuan, "Kan pahniha kan inkawpa inngeih taka kan awm hian Pakistani leh Indian-te zawng zawng hnenah thu sawi vak vak lo mah ila entawn tur kan dahin ka hria. Ka sawi fo tawh angin Rohan-a nen hian court chhung leh a pawna inngeih takin kan awm thei a, hetiang bawk hian engvangin nge Pakistani leh Indian-te hi an inngeih theih loh teh lul ang," a ti.

2010 FIFA World Cup-ah Argentina an mualpho a, Spain an champion. Thawhleh zana Buenos Aires-a friendly match-ah erawh Argentina an chak a, Spain an mualpho.

Argentina chuan friendly match-a an mikhual Spain chu 4-1 ngawtin an hneh a, World Cup-a champion Spain hi an champion hnua an chak loh hmasak ber a ni a, kum 10 chhunga goal an chhuah tam ber tum a ni. Argentina coach-a an rawih lailawk Sergio Batista chuan, "Spain kha kan hmuh thin Spain an ni lo a, an khelh chhiat chhan kha Argentina khelh that vang a ni," a ti.

Inkhel chanchin
He inkhelah hian Argentina tan star player-te an che tha a, Lionel Messi, Gonzalo Higuain leh Carlos Tevez-te'n first half-ah goal an thun vek a, Spain keeper Pepe Reina a che chhe bawk si a, a chhuah ho thei hle a ni.

Minute 10-naah Messi a che tan a, Pepe Reina chu a pet khum a, 1-0 a ni. Minute 13-naa Higuain-a pet goal hi Iker Casillas chu ni se a dan ngei a rinawm a, a chhuah ho angreng hle. Minute 34-na a ni a, Reina chet chhiat a kalt luang a, ball pet chhuah a tum a tawlh palh a, Tevez-a'n goal a thun phah ta a, 3-0 a ni.

Minute 84-naah Fernando Llo­rente chuan Spain mualpho tur a hliahkhuh a, nimahsela Spain-a inkhela eizawnga awm mek Sergio Aguero chuan injury time-ah a thun leh a, Argentina 4-1 in an chak.

Goal lut zat en ang ngawt erawh a ni lo a, David Villa chuan first half-ah goal ban leh bar a pet per a, lut ta se a dang deuh thei ang.

Inkhel thlirna
Spain hi an insiksawi nual a, World Cup final-a Netherlands hnehtu team-a mi player panga chiah starting eleven-ah an lut. World Cup final starting XI-a mi, tun tuma a tira lut chu defender Gerard Pique; midfielder Andres Iniesta, Sergio Busquets leh Xabi Alonso-te bakah forward David Villa chiah an ni.

Argentina pawhin World Cup-a an mualphopui player an paih nual a, World Cup-a an koh loh Ever Banegas leh Esteban Cambiasso-te chu midfield-a roreltu an ni. Heng player pahnihte hian Spanish midfielder thate an veng hneh a, an thiante tan ball hlauhawm an siamsak thei reng bawk.

Messi a lang tam lo a, a lan hunah a hlauhawm thei hle. Goal a thun hnu lawkah Angel Di Maria goal thun tur a siamsak a, hei hi offside vangin an pawmsak ta lo. Argentina defender Martin Demichelis chuan Messi a fak a, "Argentine mi­puite pawhin tunah zet chuan an lawm hle mai a, hei hi Messi tan thil tha tak a ni," a ti.

Eng nge an sawi?
Argentina team enkawltu Batista chuan, "South Africa atangin mualpho takin kan haw a, tunah hian World Cup-a champion thei player kan nei tih kan lantir a ni... Kan duh ang leh beisei ang takin kan khel thei a, Spain khelh chhiat chhan kha kan khelh that vang a ni," a ti.

Spanish coach Vincente del Bosque chuan, "Kan chak lo a, nimahsela kan theihna zawng zawng nena khel chunga chak lo kan ni a, kan mualphoin ka hre lo. Argentina tlarhma kha an che rang em em mai a, inkhel an thunun tlat a, kan chet velna turin hmun min zuah lo a ni. Chak loh chhuanlam ka zawng lo a, Argentina kan hneh lo hi a mak ka ti hran lo," a ti.

Argentina tlar hmaah Spanish League-a player hlauhawm pahnih Messi leh Higuain an inkawp a, a tawp lama lut Aguero pawh La Liga-a player hlauhawm ber pawl a ni reng a ni.

American mipa dam awm chhun Sam Querrey a tla ve leh ta a, US Open-a US mi dam awm chhun chu Venus Williams chiah a ni ta.
Venus hian quarter final-ah French Open champion Francesca Schiavone chu Thawhlehni khan 7-6 (7/5), 6-4 in a hneh. Grand Slam-a vawi sarih champion tawh Venus hi kum 30 a tling tawh a, 2005 US Open-a Mary Pierce-i hnua kum 30 mi hmeichhe singles semi final lut hmasa ber a ni.

Venus hi a khel
tha tluang a, set a la hloh miah lo. Venus chuan, "Thli a thaw nasa a, kan pahnihin kan duh ang takin kan khel tha lo ve ve a, nimahsela ka chak ta tho a, ka lawm  khawp mai... a boruak a san deuh hunah pawh tun aia tha zawka khelh theih zel hi ka inbeisei," a ti.

Schiavone chuan, "Ka hneh theih ka ring thin a, ka hneh lo leh thin; nimahsela ka la bei zel ang. Point pawimawh hun takah a hlah tha duh lo a, a tifuh leh tlat zel a, chu chu kan danglamna a ni," a ti.

Clijsters pawh a chak
Kim Clijsters a chak a, a chak hram a ni - Sam Stosur nen an inkhel a, champion lai Belgium nu hi 6-4, 5-7, 6-3 in a chak a, semi final a lut.

Clijsters hi US Open-ah bik hian match 19 chhung hneh loh nei loin a kal tluang tawh. He Belgium nu hi 2005-ah khan a nulatlaiin a champion a, he mi hnu hian tennis chawlhsanin nikumah a lo kir leh a, nikumah US Open-ah a champion bawk si a, 2004-a a chak loh hnuah US Open-ah hneh loh a la tawng miah lo.

Clijsters chuan, "Ni 10 ka inkhel tawh a, khua a lum si a, a hahthlak takzet a, ka inkhel zawng zawngte hi ka beih chiam a ngai vek mai," a ti.

Clijsters hian semi final-ah Venus a hmachhawn dawn a, anni pahnih hi US Open-a vawi hnih lo champion tawh ve ve an ni.

Dâl zawh loh
US Open mipa round of 16-a (fourth round) player 16 zinga paruk hi Spanish an ni a, chung zingah chuan Rafael Nadal a langsar ber. US Open-a la champion lo, final pawh la lut ngai lo Nadal chuan Nilaini khan a hnampui Feliciano Lopez chu 6-3, 6-4, 6-4 in a hneh.

Nadal hian tun tournament-ah set a la hloh lo a, tun tuma fourth round inkhel hi an zawh meuh chuan an sanaah Nilaini zing lam dar 1:16 a ni tawh! Lopez chuan, "Hetiang huna inkhelh hi a hautak a, mut hun tawha la men kar a ngai a, kei leh Rafa tan a hautak ve ve a ni," a ti.

Nadal hian Spanish player a hneh zo chiah a, quarter final-ah Spanish player dang No. 8 Fernando Verdasco a hmachhawn dawn a, hei hi US Open-a Spanish mipa pahnihte quarter final-a an insut hmasakna ber a ni ang. Anni pahnih hi 009 Australian Open semifinal-ah inkhel ropui takah an intawng tawh a, darkar 5 leh minute 14-ah Nadal a chak hram a nih kha.

Verdasco hian Nadal hi vawi 10 a hmachhawn tawh a, a la hneh lo fai vek a, "Mi zawng zawngin No.1 a ni tih an hria a, player ropui a ni. Ani ka khelh tuma ka record hi a tha lo tih hre mah ila, ka theihna zawng zawngin ka bei ang," a ti.

Verdasco hian Spanish player tho David Ferrer chu 5-7 6-7(8) 6-3 6-3 7-6(4) in a hneh a; Stanislas Wawrinka (Switzerland)  chuan quarter final lut turin Sam Querrey (USA) chu 7-6(9) 6-7(5) 7-5 4-6 6-4 in a hneh a; Mikhail Youzhny (Russia) pawhin quarter final a luhna kawngah Tommy Robredo (Spain) chu 7-5 6-2 4-6 6-4 in a hneh a ni.

Aston Villa chuan an manager tharah Gerard Houllier an lalut dawn ta.

French football ma­nager hian kum ruk chhung Liverpool a lo enkawl tawh thin a, he chanchin i chhiar hi chuan Villa boss ni turin an lakluh hman a rinawm.

Houllier hi French Football Federation hnuai­a an technical director a ni a, he hna hi a chawlhsan hnuah Villa boss thar atan lakluh a ni ang. Nimin khan French Football Federation nen an indawr a, an in­then dawn niin BBC chuan a tarlang.

Villa hi season tan dawn khan an manager Martin O'Neill chuan a chhuahsan thut a, player lei leh hralh chungchangah team neitupa Randy Lerner nen an inhmu thiam lo a, O'Neill hian team tha taka a din chhuah Villa hi a chhuahsan ta a ni.

Villa hi tun hnaia Premier League team tha ber zinga mi an ni a, Champions League thleng phak chiah lo mahse Europa League khel phak tawkin an inpêt tling zel a ni. An manager chhuak ta O'Neill khan 'Big Four' team-te el phak ve tura player lakluh belh a, player thate chhuahtir loh bawk a duh a, nimahsela sum mamawh Villa team hian an thiampuipa Gareth Barry an hralh a, James Milner an hralh leh a, an manager an chân phah ta a ni.

Villa hian tun season-ah Newcastle United an hneh lo tawh a, 0-6 ngawta an hneh loh avangin manager thar hi an mamawh tawh hle a ni. Europa League atangin an tla zui nghal bawk a, hengte hi manager nghetin enkawl se, result a danglam deuh mai thei?

Villa boss tur
September 3, 1947-a piang Houllier hi manager tawnhriat ngah tawh tak a ni a, Paris Saint-Germain, RC Lens, Liverpool leh Olympique Lyon-te a lo enkawl tawh thin a; 1992&1993-ah France national team pawh a lo enkawl tawh thin.

1998 World Cup-a France an champion tum khan assistant manager a ni a, mi tam tak chuan he mi tuma an manager Aimé Jacquet hi Houllier-a vanga hlawhtlingah an ngai hial a ni. 1996 European Under-19 Football Championship-ah an ram team a champion-pui a, tun hnua French star langsar tam tak - Mikaël Silvestre, William Gallas, Thierry Henry, David Trezeguet, Nicolas Anelka - hi a kutchhuak an ni.

1985–86 season-ah French League-ah PSG a champion-pui a, Liverpool-a a kal hnuah UEFA Cup, UEFA Super Cup, FA Cup leh Football League Cup-ah a champion-pui vek bawk. Lyon-ah lut lehin 2005-06, 2006–07 ah a kum zawnin French League-ah a champion-pui leh bawk.

Boxing leh mixed martial arts lam ziaktu sports writer lar tak, award hrang hrang lo dawng tawh Kevin Iole chuan tun hnaia boxing khawvela boruak nei lian ber pawl a thlang chhuak a, heng a mi thlanchhuah zingah hian boxer chauh lo, a buaipui tu pawh an awm nuala mi hrang hrang a ngaihdan hi i lo thlir teh ang.

1.    Muhammad Ali (Boxer) - Ali hi boxer ropui ber tih ngawt theih a ni bik lo a, mahse boxer ropui berte zingah chuan a tel chiang a, boxing khawvela a luh hma leh a luh hnuah ani ang reng renga huhang nei lian hi an awm lo hial ang. A style hrang hrang hi tun thlengin boxer tam takin an la copy a, boxing a chawikan nasat em avangin chawimawi a phu takzet.

2.    Joe Louis (Boxer) - Joe Louis hi African American-te'n civil rights neih tuma an beih laia an 'hero' a ni a, sports writer ngaihsan hlawh berte zinga mi Jimmy Cannon phei chuan, "Joe hi hnam bil tana pawimawh bik a ni lo a, khawvel mihring zinga mi pawimawh ber pawl a ni," a ti hial a, 1938-a Max Schmeling a hneh tum khan America mipuite rilru put hmang nasa takin a thlak a ni.

3.    Tex Rickard (Promoter) - Boxer ni lo zinga lang hmasa ber chu Rickard hi a ni. Rickard hian New York-a Madison Square Garden a sa a, he hmun hi tun thlengin inhnekna hmun ngaihhlut ber pawl a nih chhunzawm zel. 1920 chhoah khan Jack Dempsey inhnek tur tam tak a promote a, dollar maktaduai khat chuangte an lak luh phah hial.

4.     Bob Arum (Promoter) - Tunlai boxing khawvela kan hmuh theih zinga lang hmasa ber Bob Arum hi promoter ropui berte zinga chhiar tel loh theih a ni lo. Hman ata tawh tun thlengin inhnek hrang hrang a promote tawh a, Ali, Sugar Ray Leonard, George Foreman, Marvelous Marvin Hagler, Oscar De La Hoya, Floyd Mayweather Jr. leh Roberto Duran-te inhnek pawh a promote tawh. Cable television-a regular taka boxing chhuah a nih theihna tura hmala nasa ber niin a hlawhtling bawk a, ESPN-ah “Top Rank Boxing” series an chhuah phah a ni.

5.    Don King (Promoter) - Boxing ngainate thinlungah Don King hi mi thar a ni lo. Tunhnaia boxing khawvela promoter ropui berte zingah King leh Arum-te hi an tel a, boxing khawvela sum hai luh hnemna ber 20 zinga 12-te hi Don King-a promote vek an ni.

6.    Sugar Ray Robinson (Boxer) - Fans tam takin Muhammad Ali hi boxer ropui bera an ngaih laiin Ali chuan Robinson hi ropui berah a ngai thung. Ali hian ring chhunga a chetdan zawng zawng hi Robinson-a chetdan a lak a nih thu a sawi a, Associated Press phei chuan Robinson hi 20th century chhunga greatest boxer, the greatest welterweight leh greatest middleweight-ah an thlang a ni.

7.    Jack Dempsey (Boxer) - Heavyweight champion hlui, a inhnek enna mana dollar maktaduai khat la lut hmasa ber a ni. Mi tam tak ngaihsan leh entawn a ni a, boxing a chawlhsan hnuah pawh miin an ngaihsanna a nep tak tak thei tawh lo.

8.    Jack Johnson (Boxer) - Johnson hi African American boxer-te tana kawng sial sak tu pawimawh tak a ni. "Fight of the Century" an tih hmasak berah James J.Jeffries a hneh a, kum zabi 20-na tir lamah phei kha chuan hneh thei an awm lo a, mahse chi leh chi inthliarnain a career a tih hnawk em avangin a tawpah phei chuan Europe lamah a pem a ni.

9.    Seth Abraham (Television Programmer) - HBO-in 1973 atangin boxing hi an tichhuak tan a, a hnu kum nga a ralin Abraham hian HBO a zawm. Abraham-a luh hnuah hian boxing chhuah chungchangah HBO hi a thang nasa hle a, a tawpah phei chuan HBO hian boxing khawvelah chanvo pawimawh tak an chan theih phah a ni.

10.    Howard Cosell (Broadcaster) - Cosell hi ABC tana boxing commentator pakhat a ni a, Muhammad Ali nen inkungkaihna eng emaw tak an nei. Ali-a inhnek zawng zawng deuhthawah commentator-ah a tang a, a inhnek mai bakah Ali-a'n Vietnam War a duh lohzia a lantirnaah pawh a tel ve a ni.

Tunhnaia boxing khawvela thawm nei lian ber ber Mike Tyson (16), Manny Pacquiao (25), George Foreman (31) leh Oscar De La Hoya (37)-te chu top 10 huangah hian an lang pha ve lo.

Tennis khawvel mai ni lo, infiamna khawvela hmeichhe zinga sum hailut hnem ber chu Maria Sharapova a ni a, a hmelthat vang a ni. He tennis star hi hmelthat leh thiam vanga lâr thar Caroline Wozniacki chuan US Open-ah a hneh a, Denmark nula hian quarter final a lut ta.

World No. 1 hlui Sharapova leh seeded No. 1 Wozniacki-te inkhelah hian kawng engkimah Wozniacki hi a chungnung a, a tawpah 6-3, 6-4 in a chak. Nikum finalist Wozniacki hi Grand Slam-a la champion lo a ni a, kumin US Open-a champion tura rinkai ber a ni.

Wozniacki chuan, "Ka khel tha takzetin ka hria a, a (Sharapova) tihsual tam takte kha keimah vanga a tihsual a ni," a ti. Sharapova hi baseline groundstroke nei tha chungchuanga sawi ni thin mah se, tun tum inkhelah hian baseline groundstroke-ah pawh Wozniacki hi a khan lo hle a ni.

Wozniacki hian Sharapova hi tun hmain a la hneh ngai lo a, 2008 hma khan vawi hnih inkhel tawhin Wozniacki hi a chak lo ve ve a, tunah chuan Wozniacki hi player tha tak a ni tawh a, a chak ta. He Denmark nula hi Wimbledon zawhah vawi 18 a chak tawh a, vawi khat chiah a la tlawm.

Wozniacki hian tun thlengin set chu sawi loh, game 10 chiah a la hloh a, 1999 hnua quarter final lut zinga game hloh tlem ber a ni. Sharapova thusawi hian Wozniacki khelh thatzia a nemnghet a, "A khelh that vanglai a tawng a, hneh ngaihna a awm lo," a ti ve tawp.
Hmeichhe fourth round inkhel dangah No. 7-Vera Zvonareva (Russia) chuan Andrea Petkovic (Germany) chu 6-1 6-2 in a sawp a, No. 31 Kaia Kanepi (Estonia) chuan No. 15-Yanina Wickmayer (Belgium) chu 0-6 7-6(2) 6-1 in a hneh a, Dominika Cibulkova (Slovakia) chuan  7-5 7-6(4) in No. 11 Svetlana Kuznetsova (Russia) a hneh bawk.

Federer a kal zel
Wimbledon-ah a chak lo a, mi tam takin upa tawh leh tlachhe tawh angin sawi mah se, ama insawi angin Roger Federer a la tlachhe lo - quarter final lut turin Jurgen Melzer chu 6-3, 7-6 (4), 6-3 in a hneh.

US Open-a vawi nga champion tawh Federer hi Grand Slam tournament-ah a zawnin vawi 26 quarter final a lut ta a, hei hian a thiamzia chiang takin a pho lang. Quarter final-a a tum tur hi Robin Soderling a ni. Soderling hi Federer-a record ropui - Grand Slam-a semi final a zawna vawi 23 lut - titawptu a ni a, kumin  French Open quarterfinal-ah Soderling hian Federer a hneh a ni.

Federer chuan, "Tun thlengin set ka la hloh miah lo a, ka lawm khawp mai. Tunah hi chuan ka khel tha tluang a, kan khingpuite lam hi an pawimawh ber lo a, kan khelh that hi chuan kan chak mai thin," a ti.

Novak Djokovic pawh a chak zel a, Grand Slam quarter final a zawna vawi ruk lut turin Mardy Fish chu 6-3, 6-4, 6-1 in a hneh. 2008 Australian Open champion hi tun hnai kum thum chhung US Open-ah hian semi final a lut tawh a ni.

No. 5 Robin Soderling pawhin No. 21 Albert Montanes a hneh a; No. 17 Gael Monfils chuan Richard Gasquet a hneh bawk.

Inhnek mang si loin Manny Pacquiao leh Floyd Mayweather Jr.-te hi ring pawnah an inbei reng a, tun hnaiah Floyd Mayweather-a'n tawngkam na takin Pacquiao a sawisel.

Pacquiao leh Mayweather-te hi inhnek an tum a, an thulh a, inhnek an tum hma leh an thulh hnu thlengin tawngkamin an inbei deuh reng. Khawvela boxer tha ber pahniha ngaih an ni a, kuttum ni loin an lei hmangin an inbei ta zawk a nih ber hi!

Mayweather hian Pacquiao chu, "English pawh thiam lo," tiin 'mawl' a tih thu a sawi a, "Kum khat vel chawl vang vang ila, lo kir leh pawh ni ila ka hneh tho ang," te a ti. A tawngkam thenkhat phei chu Asian a nih vanga Pacquiao a hmuhsitna rawngkai a ni.

Pacquiao chuan, "Hetiang thu hi lehkhathiam lo thu mai mai a ni. Ka la en ve lo a, mahse an sawi ka hria a, engahmah ka ngai lo. Min hnek ngam lo a, a tlanchhia a, a tihawm tawk vel a ti mai a ni," a ti.

Mayweather hi a thusawi thenkhatah a inchhir leh deuh a, video dang chhuak thar ah, "Ka thusawite avang khan min ngaidam rawh. Fiamthuin ka sawi ve mai mai a ni... khatianga mi deusawh zawnga sawi tum pawh ka ni lo," a ti leh lawi si.

Manny Pacquiao a fing ve tlat tawh a, Mayweather-a buaipui ai chuan November 13-a Antonio Margarito nen an inhnek tur lam a hawi daih a, "Tunah chuan ka hmaah inhnek tur ka nei a, chu chiah chu ka ngaihtuah ang," a ti.

Khawvel mipui en chak, Mayweather-Pacquiao chu a thleng dawn lo a ang ta hle mai a, Pacquiao chuan, "Boxing-a ka thil tih hi ka duhtawk tawh a, he pa hi ka hnek kherna chhan tur ka hre lo. Ani ka hnek avanga ka ropui belhchhahna tur pawh ka hre lo," a ti ve deuh sak mai.