American Idol season thar tur chuan tan a nih hma atangin boruak a nei lian hle a, judge chungchangah sawi neuh neuh a tam hle a ni. American Idol judge atanga chhuak Kara DioGuardi chuan Jennifer Lopez chu a ken avanga judge dinhmun luah thei a nih thu a sawi.
Kara DioGuardi chuan tun hun hi a tan chhuah hun tha ber nia a hriat thu sawiin,"Kum hnih kal ta a American Idol judge dinhmun ka chan tirh khan lottery man ang maiah ka in ngai a ni. Mahse, tunah chuan judge dinhmun hi chhuahsan hun atana tha berah ka ngai," a ti.

American Idol Judge a ni chu a in chhuan thu sawiin Kara DioGuardi chuan, "Hetiang dinhmuna ka ding thei hi ka inchhuang tak zet a ni. Ka tan chuan tawnhriat mak tak a ni.........chona thar hmachhawn turin ka in puah chah a, mipuite min support-na ka mamawh a ni," tiin, American Idol season 10 a inhnamhnawih tur zawng zawngte duhsakna hlan.

FOX's programming president Mike Darnell chuan Kara DioGuardi hi a ui thu sawiin, "Kara hian Idol chhungkua a ti phuisui a ni. Ka zinga a awmlaia a thil tih zawng zawngte kha a ropui hle. Tunah chuan min chhuahsan dawn ta a, a kal zelna turah a hlawhtlin theihna atan duhsakna kan hlan a ni," a ti.

Executive producer Ken Warwick pawhin Kara a uithu hi sawiin, "Kara hrechiangtute chuan rin phak bak inrintawkna, leh huaisenna a thil tihna kawng hrang hrangah khan a nei tih an hria ang," a ti. Executive producer vek Simon Fuller pawhin Kara a uithu hi a sawi chhuak a ni.

Hetihlai hian American Idol thuneitute chuan final audition neihna atan Los Angels an thlang fel a tawh a ni.

Actress chhe lo Angelina Jolie chuan a fans te chu Pakistan tuilian tuar tanpui turin a fuih a. Tuilian tuar mi tak tak, in leh lo chhe ta leh chênna nei loten mamawh tam tak an nei a, chung chu donate turin a ngên.

Jolie hi tunah hian UN goodwill ambassador a ni a, tuilian tuarte tanpui nan hian ama pawisa $100,000 zet a thawh tawh a. Tunhnaia a film thar Salt tilara a zinkualnaah Pakistan tuilian tuarte tanpui tur hian a fans leh he film en tura pungkhawmte a chah a ni.

"Hei hi mihringa chhiatna rawn thleng a ni ringawt lo va, khawtlang leh ei leh bar kawngah pawh chhiatna tam tak a thlen a ni. Nasa takin kan tanpui thei a, tunah hian puan-in, ei tur, tui thianghlim leh damdawi an mamawh em em a ni," a ti. Pakistan-a tuilian avang hian mi 1500 chuang zet an thi a ni.