Tripura sorkar-in kum 2011-12 fiscal chhunga chhiah a lak atanga a sum hmuh chu kum hmasa lam aiin 38.24% in a pung. Hetihlai hian ram pum huapa a punna chu 24% a ni thung.

State Commissioner of Taxes and Excise, Brijesh Kumar Pandey chuan, 'Kum 2011-12 financial year chhunga Tripura-in chhiah a lak atanga a sum hmuh chu cheng vaibelchhe 775.90 a ni. A kum hmasa (2010-11) khan Rs vbch 561.27 a la lut a ni' a ti. Tripura-in sum a lakluh punna hi kum 30 chhunga a san ber tum a ni.

State sorkarin kum 2011-12 chhunga thil hrang hrang atanga chhiah a lakluh tura a ruahman zat hi Rs vbch 722.19 a ni a, mahse a ruahman aia tam zawk a la lut thei a ni.

Official-te chuan chhiah atanga sum an lak luh hi a pun zel theih nan Mission Mode Project (MMP) kaltlangin computerisation system hman vek a ni dawn tih an sawi a. Pathianni atang hian department hrang hrangah inzirtirna neih a ni ang.

Nilaini khan Meghalaya khawpui, Shillong-ah taksa lama rualbanloten state sorkar laka an lungawi lohna lantirin kawng an zawh.

Khasi Disabilities Association (KDA) hminga kawng zawh huaihawttute hian state sorkar chuan an harsatna tawhte a ngaihtuah pui lo a, an thil phutte pawh a ngaihsak tawk lo niin an sawi. KDA thil phut zingah hian district medical board-in rualbanlo nia a pawm, certificate a pek chhuahte chu sorkarin tanpui pe tur leh, RSBY (Rashtriya Swasthya Bima Yojana) smart card pekte a tel.

Kawngzawhte hi Secretariat office-a luh an tum a, mahse police-te an lo dan avangin State Central Library-ah inkhawm an buatsaih ta a ni. KDA chuan sorkar-in rualbanlote harsatna a ngaihsak loh avanga an manganna hriattir nawn fo a ngai chu thil pawi tak a ni, a ti.

KDA hminga nawrh huaihawtte hi Commissioner for Persons with Disabilities, IR Sangma chuan a hmu a, rualbanlote puala scheme siamte chuan sorkar department hrang hrang a kaihhnawih tel avangin rang taka tihpuitlin mai theih a ni lo tih a hrilh a, buaipui mek a nih thu a sawi.

North East Students' Organization (NESO) chuan June 7 hian hmarchhak bial pumah an thil nawr tihhlawhtlin phutin nawrh huaihawt an tum.

NESO-in hun rei tak chhung a lo phut tawh zinga hian hmarchhak tana time zone hran siam te, special constitutional status pekte a tel. Hei bakah hian hmarchhak state thenkhata sipai thuneihna sang, AFSPA hman mek tih tawp te, ramchhung hmun danga hmarchhak zirlai awmte himna tur siam sak bakah zirlaite harsatna tawhte enfiahtu tur Special Education Commission dinte a tel a ni.

Tripura-a sorkar enkawl ar vulhna farm-ah bird flu a len leh avangin nimin atang khan ar suat hna thawh tan nghal a ni.Thla thum liamta khan bird flu vang hian ar suat a lo ni tawh bawk.

Naga Students' Fe­deration (NSF) chuan state sorkarin an thil phut panga-te a ngaihsak loh avanga an lungawi loh thu sawiin, an lungawi lohna lantir nan vawiin hian Directorate of School Education khar an tum bakah, poster campaign neih an tum.

Manipur Chief Minister, O Ibobi Singh chuan Manipur mipuite chuan Congress party an ring tawk a, hel pawl hrang hrangte Congress candidate-te dodal zawngin campaign mah se, mipuite chuan Congress party chauhin an tan thil tha a thlen thei tih an hria a ni, a ti.

Pathianni-a Manipur hill district panga-a vote thlak thatnaa vote tla chu 70% a tling. Polling station 63-ah vote hi thlak that a ni.

Tamenglong district-a polling station pali-ah chuan khaw chhiat leh leimin avangin vote thlak theih a ni lo a, polling party-ten polling station awmna hi an thleng thei lo. Nimin khan heng polling station pali-ah hian vote thlak thattir an ni.
Leimin leh khawchhiat avanga polling station 4-ah vote thlak loh tih loh, hmun dangah chuan boruak tha tak hnuaiah vote thlak a ni. Vawiin hian Manipur inthlan result hi chhiar a ni dawn a, tlai lamah result kimchang puan hman beisei a ni.
Manipur-a rorel lai, Congress Party ni lo, political party dang 11-te chuan Congress tel lohna sorkar din a nih theih nan thawhho an remti.

Eptu Party hrang hrangte hian tum eng emaw zat meeting an neih hnuah, Inrinni zan khan tangrual pawl, People's Democratic Alliance (PDA) din an remti ta a ni.

People's Democratic Alliance thupuangtu leh State CPI Secretary, Moirangthem Nara chuan tangrual pawl chuan vawiina inthlan result puan a nih hunah, sorkarna an siam thei ngei dawn niin a sawi. People's Democratic Front hi nikum December 3 khan party panga-ten an din a, thawhpui tura party dang dangte an biak kual hnuah, tunah hian party 11 an awm tawh.

Hetihlai hian Pradesh Congress Committee President, G. Gaikhangam chuan an party chuan a term thumna atan sorkarna an  siam leh dawn tih a sawi a. PDA hnuaia party hrang hrangte chuan Manipur ram humhalh an tum thu lo sawi thin mah se, Naga party-a Naga People's Front (NPF) an thawhpui ta niin a sawi. NPF hian Manipur-a Naga hnam chenna bial chu Nagaland nena infintir an tum a ni.

Kar hmasaa Karbi Anglong district, Assam-a helho nia hriatten Assam Chief Conservator of Forest Abhijit Rabha leh Range Officer Ranjan Barua an rukbo chu nimin thleng khan an chin hriat a la ni lo.

Pathianni khan Karbi Anglong Autonomous Council’s Chief Executive Member, Joy Ram Engleng kaihhruaina hnuaiah high-level meeting neih a ni a, Deputy Commissioner Rakesh Kumar leh SP D B Chetry pawh an tel.

Engleng chuan officer pahnih rubotute chu an mi mante chhuah turin a ngen a. Hetihlai hian officer rukbotu nia rinhlelh, Karbi hel pawl, Karbi People’s Liberation Tigers (KPLT) chuan he thil thlengah hian inhnamhnawihna an neih loh thu an sawi.

KPLT general secratary, Nilip Enghi chuan, 'Officer pahnihte rukbonaah hian KPLT chu a inrawlh lo a, mahse eng pawl emaw tih a ni ngei ang' a ti.

Police-te chuan officer rukbote chhanchhuah tumin beihpui an thlak chhunzawm reng a ni. Forest offcial rubotute hian an mi rukbote tlanchhuahna atan cheng vaibelchhe khat an phut thu an sawi tawh a ni.