BJP hruaitu, Varun Gandhi chuan nimin khan Guwahati-ah chanchinthar lakhawmtute kawmin, Bangladesh atanga dan loa Assam-a lutte chungchang chu Assam state chauh ni lo, rampum huapa ngaihven ngai thil a nih thu a sawi.

BJP hruaitu chuan, India sorkar chu a mite tana a din a hun a ni tiin, hetianga diklo taka lutte hi chhinchhiah fel an ni ngai lo a ni, a ti.
Bangladesh atanga India rama rawn lutte hi a tam zawk chu Muslim niin, Assam-a district 27 zinga pariat-ah tam tak awmin, inthlanah pawh an vote in awmzia a nei tham hle a ni.

Assam hian assembly inthlan neih a ni dawn a, hemi tan hian an party tichak turin Varun Gandhi hian Assam hi a tlawh a ni. Hei hi Assam a tlawh tum khatna a ni. Varun Gandhi chuan inthlan lo awm turah an party chu chak ber  tur a ni thu sawiin, an party chuan sorkar tha leh muanna, hmuingilna a pe thei a ni, a ti.

Assam Chief Minis­ter, hun rei tak chhung damlohna avanga chawl, Tarun Gogoi chuan September 13 hian hna a thawh chhunzawm thei dawn niin state sorkar thuchhuah chuan a sawi.

Gogoi hi a lunglam tha lo avangin Mumbai-ah zai a ni a, ziawm lam a pan tawh a, tunah hian  physiotheraphy a la mek a ni. Mumbai atangin New Delhi a thleng tawh a, September 10 hian an state-ah kir lehin, ni 13 atangin CM hna a thawk leh thei tawh dawn a ni.

Gogoi hi Mumbai atangin nurse pathum leh  physiotherapist-ten zuiin an enkawl a, Assam-ah pawh an enkawl chhunzawm zel dawn a ni. New Delhi-a a awm chhung hian Gogoi hian Congress President atana thlan thar, Sonia Gandhi chu lawmpuina hlan turin a be dawn nia sawi a ni.

Meghalaya Police com­mando-te chuan East Garo Hills district-a helpawl, ULFA tawmkuk  hmuchhuakin, Thawhlehni zing khan hello nen an inkap. Police-te hian beihpui an thlakna hmun atang hian silai leh a mu thahnem tham tak an man bawk a ni.

Helho leh police-te inkahna hmun hi Songsak police station hnuaia Danal Dasik bialah a ni a, helho hi paruk an ni. Meghalaya Police hnuaia  pecial Weapons And Tactics (SWAT) unit leh  helho hi nasa taka an inkah hnuah helho hi ramhnuai lamah an tlanchhe ta niin police official chuan a sawi.

DGP SB Kakati chuan East Garo Hills district-a chu ULFA-te tawmkuk pui ber awmna a nih thu sawin, he hmun atang hian Assam state-ah an che thin niin a sawi. Tunhnaia Assam Goalpara district-a bomb a puah hnu khan ngawrh takin helpawl lakah hian beihpui thlak a nih thu a sawi bawk.

ULFA helpawl  man tur hian SWAT commando leh police-te tirh an ni a, Thawhlehni zinga an tawmkuk an beihna hmuna hel paruk awm zingah hian ULFA 109th Battalion commander, Gulit Das pawh a tel nia hriat a ni. Helho zingah hian thi leh hliam tuar an awm leh awm lo an hrechiang thei lo niin police-te chuan an sawi.

Tripura Congress hruaitu hlun, Prime Minister hlui Indira Gandhi hnungzuitu rinawm tak, Ashok Bhattacharjee chu Thawhtanni khan kum 73 mi niin a thi.

Bhattacharjee hi hmarchhak biala Congress hruaitu zinga Indira Gandhi thleng thei awmchhun a ni. Kum 1983 kum khan Tripura state tlawha a zin tumin Bhattarcharjee inah hian Indira Gandhi hi a thleng a ni.

Ashok Bhattacharjee hi kum 2008 thleng khan State Assembly member atan tum thum thlan a ni a, kum 1998-2003 chhung khan eptu  hruai hna a thawk bawk. Kum 1971-91987 khan Tripura Congress hotu hna  a chelh a, 1972-1974 leh 1978-1987 khan Congress Working Committee member niin, kum 1971-a Bangladesh Liberation War lai khan hna pawimawh tak a thawk bawk.

Union Finance Minister Pranbak Mukherjee, Tripura Chief Minister Manik Sarkar, CPI-M Central Co­mmittee member Bijon Dhar leh hruaitu pawimawh tak takten Bhattarcharjee an ui thu hi an sawi. A ruang hi Battala thlanmualah Thawh-
tanni chawhnu khan halral a ni.

Arunachal Pradesh sorkar chuan an state chhunga public distribution system sum tam tham tihchingpen chungchang chhuitu, Special Investigating Cell (SIC) chu Gauhati High Court kaihhruaina hnuaia awm a ni, a ti.

Chief Minister Dorjee Khandu chuan Assembly-a Trinamool Congress MLA Tani Loffa zawhna a chhannaah hei hi sawiin, Gauhati High Court hnuaia awm a nih vangin SIC hnathawh leh kalphungah chuan state sorkar chuan engmah lo sawi ve tur a nei lo tih a sawi.
CM chuan, 'Kum 2005 khan state sorkar chuan SIC hi a din a, court chuan sum tihchingpen chungchang hi chhui turin thuneihna a pe a ni' a ti. Thubuai 31 ziahthar a ni thu sawiin, heng zingah pariat chu sub-judice hnuaiah niin, thubuai 14 chu chhui mek a ni bawk. Sum tihchingpen chungchang chhuitu, SIC team-ah hian officer 17 an awm a, an zingah hian SP, Deputy SP 2, inspector 5, sub-inspector 3 leh constable 6 an tel a ni.

PDS sum tihchingpennaa inhnamhnawiha puh, Chief Minister hlui Gegong Apang chu SIC hian an man tawh a, mahse hei eptu leh  Apang  chuan na taka sawiselin, rorellai party-ten politics lama tihchhiat tuma an phiarrukna niin an puh a ni. He puhna hi chhangin, Parliamentary Affairs Minister Jarbom Gamlim chuan SIC chuan High Court thu angin Apang an man a, state sorkar chuan mawhphurhna engmah a neilo, a ti. 'Pawl thenkhat chuan Apang man a nih dan hi politics lam thila  kaihluh talh an tum a ni. Court-in rem a tih chuan state sorkar chuan PDS sum chingpen chungchang hi CBI chhuitir a duh reng a ni' a ti.

Ni hnih chama Manipur state tlawhtu, BJP Mahila Morcha hotu, Smirti Irani chuan sorkar laipuia Congress kaihhruai UPA sorkar chuan hmarchhak bial, a bik takin Manipur state chu a hlamchhiah hle niin a sawi.

Imphal Airport a thlen hnua chanchinbu miten an kawmnaah, Irani chuan, 'Sorkar laipuiin Parliament-a a hmalakna report a sawi chuan hmarchhak mite beisei a pha lo hle a ni. A bik takin hun rei tak chhung National Highway dan a nih vanga harsatna nasa tak tawktu, Manipur mipuite beisei a pha lo a ni' a ti. Irani chuan Manipur pawhtu kawngpui pawimawh dan a nih vanga mipuite tawrhna chu a hriat thu leh, a tuar nasa berte chu hmeichhiate an nih thu a sawi.

Irani hian Manipur BJP women wing conference a hmanpui bakah, state chhunga hmeichhe pawl hrang hrang hruaitu leh aiawhte a hmu bawk. Delhi lama an hotute hnenah state chhunga hmeichhiate dinhmun, harsatna an tawh dante a thlen tur thu a sawi bawk.

BJP hian August 31 khan Rajya Sabha inkhawmah Manipur pawhtu kawngpui dan chungchang hi an lo sawi chhuak tawh a, a hma niin Lok Sabha-ah an sawi chhuak bawk. BJP National Spokesperson leh Rajya Sabha MP, Tarun Vijay chuan Manipur-ah boruak muanawm leh nunphung pangngai a awm leh theihna tura rang taka hma la turin sorkar laipui a ngen a ni.

Kawngpui dan a nih vang hian Manipur-ah thil man nasa takin a to phah bakah, mipuite mamawh phuhrukna daih a awm lo bawk. BJP Manipur Pradesh chuan Chief Minister O Ibobi Singh chu mipuite nitin mamawh pe zo loah leh, thil man sang leh ei leh in lama an indaihlohnate chingfel tura ruahmanna siam thei loah puhin, bang turin an phut a ni.

Star Cement Private Limited Director, Narendra Kr Nimodia chu Ningani chawhnu khan Jorabat-Sonapur bial atangin misual tu tih hriat lohten an ru bo a, mahse darkar riat hnuah Shillong-ah a rubotu lak atang hian a tlanchhuak leh a ni.

Police-te chuan Nimodia hi Ningani chawhnu dar 2.45 vel atang khan a chin hriat lohin a awm niin an sawi. Senior Su­perintendent of Police (City) Pradeep Chandra Saloi chuan  Star Cement Private Limited neitu makpa, Narendra Kumar Nimodia hi Jorabat bialah a motor, Scorpio ASO1 AP 1000 atangin restaurant-a chaw chhun ei turin a chhuk a, a driver chuan kawngsirah motor a lo dintir a, mahse darkar khat hnuah pawh a rawn kir tak loh avangin a driver Binod Barua chuan Star Cement Office hnenah a hriattir ta niin a sawi. 

Hetihlai hian mi pakhat, tu tih hriatloh chuan Star Cement Office hi biain Narendra Kumar Nimodia chu an kuta a awm tih a hrilh a ni. Office pawhin Nimodia hnen atangin phone an dawng a, mi paliin an rubo tih a sawi hman chauh a, thildang a sawi zawm hman lo niin an sawi.  

Nimodia hi rukbo a nih atanga darkar riat hnu, zan dar 9 velah  Meghalaya khawpui Shillong-ah hmuh a ni. Meghalaya po­lice-te chuan Star Cement director hi Eastern Air Command headquarters bul, Shillong-ah traffic jam laiin a rubotute motor atangin a tlanchhuak niin an sawi. Meghalaya police official chuan, 'Nimodia rubotute chu traffic jam chhan enfiah turin motor atang chuan an chhuk a, hemi lai hi remchangah hmangin Nimobia hi a tlanchhuak a, an bul hnaia Eastern Air Command headquarters gate chhungah tlanlutin duty hnenah thil awmdan a hrilh ta a ni' a ti.

Meghalaya police-te chuan Nimbodia rubotute hi misual pawl, a tlanna tur sum duh vanga rubo nia an rin thu leh,  Meghalaya state chhunga hmun fianrialah hruai an tum nia a lan thu an sawi. Nimin zing khan Assam police-te chuan Nimodia hi Guwahati-ah an hruai haw nghal a ni.

Pathianni khan Guwahati khawdai, Sonparu atangin sumdawng mi pahnih, Bihsnu Kedia leh Sanjay Agarwal-te chu rukbo an ni bawk a, mahse heng mite hi Ningani khan chhanchhuah an ni.

Sum tam tak tih­chingpennaa inhnamhnawiha puha Special Investigation Cell (SIC)-ten an man, Arunachal Pradesh Chief Minister hlui, Gegong Apang chhungte chuan Central Bureau of Investigation (CBI) chhuitir an phut thu an sawi.

Nilaini khan Apang chhungte chuan press conference buatsaihin, hetah hian a fapa, Union Minister of State hlui Omak Apang chuan Gegong Apang puhna chu Gauhati High Court-ah thlen an tum thu a sawi. Apang chhungte chuan politics lam phuba lakna atan leh phiarrukna atan Chief Minister, Dorjee Khandu thlawptute chuan hetiang hian an puh niin an sawi bawk.

Apang chhungte hian AICC hruaitute leh UPA minister-te pawh hmuin, an hmalaknaah thlawp turin a ngen tawh a ni. Omak chuan AICC general secrtary in-charge, V Narayan Swami, Oscar Fernandes, Digvijay Singh, Ahmed Patel-te an hmu tawh niin a sawi. AICC hruaitute hian state hotute nen Apang chungchang hi an sawiho mek tih an sawi a ni.

Omak Apang chuan a pa Chief Minister a nih lai hian an state budget chu Rs vaibelchhe 1,000 aiin a hniam thin niin a sawi a, hei vang hian mipui leh civil society member-te chuan diklo taka a pa puh a nih dante hi hrethiamin an tan tawh zawk a ni, a ti.