Thu zawh turin mi 7 man tawh
Bungthuam tlangval, Zarzokima kah hlum a nih avanga Tuikuk khaw hrang hranga buaina thleng chuan nimin lam khan ziaawm lam a pan a; police hotute chuan Pathianni zan atang kha chuan in hâl leh tharum thawhna thleng an dawng tawh lo tih an sawi. Zarzokima thih chungchangah hian thu zawhfiah atan police ten mi pasarih an man tawh a ni.
Tuikuk khaw thenkhat hâla cheng, in nei ta lote chu community hall leh sikulahte dah an ni a, sorkar lamin an ei tur leh mamawh zual dangte an ngaihtuahsak a, tlawmngai pawlte'n an tanpui bawk. Police hotute sawi danin, tharum thawhnaah hian in hâl bak buaina a awm loa, mihring thi leh hliam an awm lo a ni.
Zarzokima thattute hi man tumin police-te'n hma an la mek a, thu zawhfiah atan mi pasarih an man tawh. Tualthattute chhui hna hi Mamit District Police-ten Mizoram Police Crime Branch kutah an hlan fel tawh a, Crime Branch hian nimin khan inthahna hmun thlengin an thil chhui tur an chhui tan a ni.
Sorkarin Zarzokima chhungte a ràlnaa tel Vanglaini palai chuan, Zarzokima thihna avanga buainain ziawm lam a pan tawh thu a sawi a, "Tunah chuan buaina lian tham thleng a awm tawh lo a, mahse mipuite an la thlabár hle niin a lang," a ti.
Sorkar thuchhuah chuan, November 13-a Bungthuam tlangval, Zarzokima kah hlum a nih avanga Mizoram khawthlang lama thil duhawm lo chhuak chungchangah sorkarin theihtawpin hmaa la zui tih a tarlang.
Sorkar thuchhuah tarlan danin, khawthlang lama thil thleng chungchangah hian Pathianni khan Chief Minister-in Council of Minister-te a chenna inah ko khawmin thil awmdan a sawipui a, a hmuna enfiah tur leh a tul anga hma la turin ruahmanna an siam.
An ruahmanna angin, nimin khan Cabinet Minister pathumte chuan khawthlang lam an pan a. Revenue Minister JH Rothuama chu West Phaileng, Damparengpui leh Salem Boarding tlawh turin a kal a; FCS&CA Minister H Rohluna'n Hriphaw leh a chhehvel khuaa thil awm dan a thlithlai ang a; Health Minsiter Lalrinliana Sailo-in Kânhmun, Bungthuam leh Bajirampur a tlawh ang. Minister Rinliana hian nimin khan Zarzokima chhungte hnenah Mizoram sorkarin a ràlna Rs. 1,00,000 a hlan a ni.
Assembly Speaker R Romawia pawh Zâmpui tlangdunga Mizo awmte dinhmun en turin vawiin hian a chhuak dawn a; Mamit bialtu John Rotluangliana, Dy. Speaker pawh a bial chhunga khuate tlawh turin vawiin vek hian a chhuak bawk ang.
Pathianni vêk khan Chief secretary Van Hela Pachuau chuan Mizoram sorkar officer pawimawh te, kohhran hruaitu leh tlawmngai pawl hrang hrang aiawhte kokhawmin, boruak an thlirho a; tualthahna vanga Tuikuk chhungkaw eng emaw zatte chhawmdawl dan ngaihtuah turin State Level Co-ordination Committee an din a ni.
Coordination Committee hi DM&R Secretary, Nghaklianmawian a kaihruai dawn a; DM&R Director V Sapchhunga, FCS&CA Director Lallungmuana leh AIG-II Neihchungnunga ten an tawiawm ang. Committee hi chhawmdawlna thilpek dawng tura ruat niin, thawhlawm lakkhawmna pawh New Capital Complex-a Secretariat kawtah buatsaih a ni.
Sorkar thuchhuah chuan, "Misual thiltih avanga pawisawi lo tam takin an tawrh avang hian Mizoram sorkar chuan pawi a ti tak zet a. Boruak tipunlun zawnga tumah che lo tur leh, chî leh chî inkara boruak tha lo siam zui lo turin mi zawng zawng a ngen. Thuthang avanga mipui chî-âi lo tur leh, thu dik chu sorkar atanga hriat tum turin a ngen bawk," a ti.