Joint Action Committee on Pay Anomalies (JACOPA) hruaitute chuan, tun kar Thawhtanni atanga nimin thlenga JACOPA-a tel sorkar hnathawkte'n mass casual leave an lâk chungchangah, an chanvo hmu tura hma la an nih thu an sawi a; sorkar hnathawkte hlawh chungchangah hian Mizoram sorkar chu 'unconstitutionally' a che-ah an puh.
JACOPA hruaitute hian an lungawi lohna leh mass casual leave an lak chungchangah nimin khan Aizawl Press Club-ah thuthar thehdarhtute an kâwm a, an chairman, Lalrintluanga Colbert-in a kaihruai.
JACOPA hruaitute chuan, hlawh chung-changa hun rei tak chhung sorkar an lo ngen tawhna a hlawhtlin theih loh avanga lungawi lohna lantir a ngai chu hrehawm an tih thu an sawi a, "Kan hlawha lungawi lohna ngawr ngawr ni loin, rorelna dik leh inang tlang thinte ang khata awm leh kan duh vang a ni," an ti.
JACOPA chuan, Mizoram sorkarin service thenkhata mite dik lo taka hlawhbi siamsakin a tisang nia sawiin, "Pay Committee 2011-in a recommend aia sangte pawh a pek theih lai a, hleih neihna (discrimination) nasa tak a lo siam tawh hi siam tha lehin, hlawhbi inang tlang thinte inang tlanga dah leh hi kan duh ber a ni," an ti a; service thenkhat chu an hna leh mawhphurhna pek vang ni si loa hlawhbi tihsansak hnua Recruitment Rules siam danglamsakte an awm niin an sawi.
LDC pha ngai lo LDC aia sanga dahte leh LDC tlukpui thin Assistant tlukpuia dah takte an awm niin an sawi a; Education department-ah, high school zirtirtute'n hlawh leh thil dangah duhsak an hlawh loh bik thu sawiin, "Zirtirtu tha lawmman (state & national award) pawh high school zirtirtute'n kan dawng ve ngai lo," an ti.
JACOPA hruaitute chuan, August 21, 2012-a Cabinet Meeting lo awm turah an thil phut, hlawha felhlelte siamfel chu agenda-ah tel sa lo mah se, ngaihtuahsak an phût thu an sawi a, "Kan sorkarah beiseina sang tak kan nei a, hun kal tawha tihsual palh lo awm tawh siam tha leh ngam turin sorkar chungah rinna kan nghat tlat a ni," an ti.
Zawhna chhangin, Lalrintluanga Colbert chuan, mass casual leave an lakah Independence Day an boycott loh thu leh, an hlawh phû tâwkin hna an thawk nia an inhriat thu a sawi a; GAD lamin mass casual leave late hming a lâk khawm chungchangah, "Danah chuan nawrh hrim hrim hi phal loh a ni. Mahse Supreme Court-in sorkar hnathawkte'n an right an claim thei a ti a, kan right kan claim a ni. Inthiam lohna kan nei lo," a ti.
Hlawha harsatna a awm chhan chu officer lian zawkte'n VIP-te thil an hrilh dik loh thin vang a nih thu an sawi bawk.
Kan right kan claim a ni: JACOPA
