Vanglaini.Org!

Nikumah khán Vànglaini chanchinbû-ah mi pakhatin BSI Finance Campaign dàn dik tâwk lo ni-a a hriat dàn a rawn ziak a. Chumi chanchin chhuah ni chuan BSI Office-ah Bible re-editing ti tùrin ka kal a; thawktute chuan an ngaih dàn an sawi nauh nauh a. Kha thuziak kha an rilru tak chuan an làwm lo emaw tih theih a ni. Khati ang deuh khán kei pawh hian ziak ka lo tum tawh thin a; mahse ka puitlin hlei thei lo a. Tûn tumah hian thil dang nèn kaih pawlhin tlêm azâwng ka rawn ziak ta a ni.

Kan ramah hian parachurch organisations eng emaw zát a awm a. Thenkhatte phei hi chu Presbyterian Kohhran atanga pensioner-te inhlâwm khâwmna a ni a. An zînga mi thenkhat chuan Synod hnuaia an thawh lai aia thawk nasa zâwk anga insawi pawh an hreh lêm lo a; Synod hnuaia an thawh lai kha chuan ‘ti ve mai mai ang’ (aitechêu ang) chauhah an inngaih thu pawh pulpit tlâng atangin an sawi hreh lo. Kawng lehlamah chuan Synod malsàwmna dawn an la duh reng a; Synod Ramthar Board hnuaiah inthlun luh dàn ‘recognised parachurch organisation’ nih theih dàn ngawt an zawng a; zawng zawng ta na ná ná chu an ni ngei rêng bawk a. Chuti chung chuan an thawhna hlui Synod aiin an pâwl din chawpah chuan tihtak arpa tuihàlin an bei a; Synod sum la hêu tùr zâwnga campaign pawh an hreh lêm lo. Pâwl kan lo din a nih pawhin dam chhûng hun tam zâwk lo hmanna, thî leh thau pawlha lo thawh tawhna sâwt deuh kher hi chu a hrisêl lêm lo a, chìn tam tlâk a ni lo ang.

Bible Society hi parachurch organisation a nih leh nih loh chungchângah inhnialna tàwp thei lo a awm dâwn a ni àwm e. BSI lama thahnemngaite chuan parachurch a ni lo tiin an tang kawh reng ang a. Wikipedia-ah parachurch porganisation an hrilhfiahna chu hetiang hi a ni, “Parachurch organizations are Christian faith-based organizations that usually carry out their mission independent of church oversight. The prefix para, is Greek for beside, or alongside” tiin. A hnuaia international evangelical parachurch organisations thenkhat a tàr chhuah number 3-naah chuan ‘Bible Society’ a dah. Chumi bul maia ‘List of Christian Organisations in New Zealand’ a tàr chhuah zîngah pawh Bible Society of New Zealand’ chu parachurch organisations zîngah telh a ni bawk. Chuvàngin BSI hi parachurch nge parachurch lo tih thûah hian a lamtangte chuan parachurch a ni lo an ti kumkhua ang a; mi thenkhat erawh chuan parachurch organisations zînga pakhatah an telh thung ang. Chu chu Mizoramah pawh inhnialna tàwp thei lo thlentu a ni zêl ang.

A nih leh BSI hi parachurch a nih loh chuan eng nge a nih ang tih chu zawhna a awm thei leh ta a. ‘Superchurch organisation’ em ni? Tûn hnaia BSI Branch hrang hrang thil tih dàn en hian an superchurch chêt deuh em âw a tih theih a. BSI chu kohhran pâwl hrang hrang thawh hona a ni a, a tangkaizia pawh phat thu a chêng lo. Mahse finance campaign neih dâwna Branch thenkhat thu tihtlûk dàn hi chu kohhran malah ngenna siam aiin an thu tihtlûk sâa vawm zui a ang ta riau a; an hun rawn ruat (dîl ni loin) te remchângah lo ngaihsak loh phei chuan sawisèl zui pawh an hreh vak lo emaw tih tùr a ni. Presbyterian Kohhranah rau rau pawh tualchhûng kohhran thenkhat hi chu duhtui tak kan la ni a. Synod lam atanga Department enkawltu Executive Secretary te hming ziak pawh awm miah loa thu rawn thlen an chîng pawh hi an inenfiah a ngai deuhin a lang. Ram pum huap thilah sub-department-in local church an rawn dàwr veleh ringawt thin hi tualchhûng kohhran thenkhat chuan kan la ngaithei lo reng a, kan kalphung niin kan hre lo. Chuti ang khawpa kan duhtui laia BSI Branch lamin finance campaign an neih tùr thu min rawn hlawm tawp mai thin hi chu a ziazâng lo deuh. Hun remchâng siamsak theih an ni ang em tiin an rawn dîl tùr ni zâwk àwm tak a ni a; chu pawh chu advance deuh taka tih a tha ang. Branch hruaitute zînga Presbyterian Minister leh Pastor-te pawh hian kan Kohhran dàn leh kalhmang hi chu an zah tùr a ni ang. An hun rawn ruata kan lo remchàn lohin vui leh vaia lák a awm thei si a. Chuvàngin zàwldawh takin hun hi min rawn dîl thin sela. A châng chuan Kohhran Upa emaw Pastor emaw pawh ni lo hi Pathianni zàn thusawitûah min rawn hlawm a; hei phei hi chu a tih chi loh hle. Presbyterian mi leh sa an nih loh phei chuan a chi loh lehzual. Pathianni zànah hian Presbyterian Kohhran tam takah chuan Upa leh Minister/Pastor chauh lo chuan thu an hril lo a, hei hi inzahsak a pawimawh ang.

Kan thu tlâng kawm nân chuan sum hmuh tam kan duh luat vàng nge ni mihring ni lo Life Member leh Patron Member-a kan indah vêl hi a ni. Mi thenkhatin an natna (cancer, zun thlum, etc.) an life a, thenkhatin an motor leh in leh lo te an life a, thenkhatin an uite an life a, thenkhatin an zawngtah leh thingthupui leh khanghû thlengin an life a. Hemi kawngah hian tha tlata kan ngaihna hi puithùna âttthlák a ni a, a Pathian thu lo a ni. Pathian hi magician ang lekah kan chantîr ta mai emaw tih tùr a ni. Mahni awmna theuh kohhranah membership fee pe loin life member kan ni vek a. BSI a nih ták avànga danglam ta tlata ngaihna rilru hi a hrisêl lêm lo. Hmàn kumah Chhingchhîp-ah khian mi pakhatin Bible kârah pawisa zepin a tawngtai pung thei an ti a; mi thenkhat sum duh lutuk chuan an pan hial a ni àwm e. Aizâwl atanga han pan pawh an awm an ti. Khati ang level-a BSI campaign neih hi a thianghlim tâwk lo a; maksak lutuka Pathian thawk tùra inbeiseitîr chiam hi a theology a him lo mai ni loin a hrisêl lo hle a ni.

Hemi chungchângah hian campaigner lâr deuh pahnih khat chuan ka thuziak an hmang sual nghe nghe niin ka hria a. Kum 1996 lamah khán ‘Bible-a Chhûngkaw Entawn Tlâkte’ tih lehkhabu ka tichhuak a. A tàwpah  chuan sermon pakhat ‘Kei leh ka chhûngte erawh hi zawngin LALPA rawng a nia kan bàwl dâwn” (Jos 24:15) tih Josua thusawi kha sermon beh chhanah ka hmang a. Ka sermon sawi zaunaah chuan he laia ‘chhûngte’ tih h Hebrai tawngah chuan ‘beth’ a ni a; chu chuan kan in leh lo a huap thei a. Kan in leh lo din dànte hi a thianghlim tâwk em tiin ka sawi zau a (p. 80). Chu thu chu BSI campaigner pahnih khatin tawng chhan takah an lo hmang thin tih ka hria a. Kha kha BSI campaign-a ui leh âr, thlai leh motor ilo leh natna thlenga huap tùra lák kàwi tùra ka sawi a ni lo. Kristian chhûngkua chu kan in leh lo din dànah pawh a thianghlim tùr a ni a, Pathian rawngbàwlna tlák a ni tùr a ni ka tihna a ni.

Ka thuziak behchhana an hman thu hi BSI hmunpui Bangalore lamah pawh Mizoram atanga hotu pakhat kal chuan a sawi lang a ni àwm e; anni chuan an ngaih dàn a ni lêm lo niin a sawi zauh ka hre nghe nghe. Puithûna âtthlâk hi Thuthlung Hlui phei chuan a do lehzual a; puithûna âtthlák hmanga BSI ber a campaign hi a dik tâwk loin ka hria a. Ka thuziak phei hi chu hmang zui tawh lo se ka duh khawp mai. BSI hi ka do a ni lo a, BSI lehkhabu chhuah phei chu hmang tangkai pâwl tak ka ni ve ang. Mahse zirtîrna him tâwk lo laka Kristiante vèn him hi thil tûlah ka ngai a; hei hi ka rawngbàwlna pakhatah ngaiin hreh tak chungin he thu hi ka ziak a ni.