AP: NPP MLA in Congress zawm, Congress MLA in BJP zawm thung

Lok Sabha inthlan a hnai zela, ramchhung hmun hrang hrangah inthlan vuakvetah thil thleng a tam hle. 

Arunachal Pradesh-ah pawh National People’s Party (NPP) MLA Tanga Byaling chuan Thawhlehni khan political leader eng emaw zat nen Congress an zawm.

NPP Legislature Party leader, Byaling hian Upper Subansiri district-a Nacho assembly-ah a zawnin term nga hnehna a chang tawh a, ani bakah hian Konsa West MLA hlui Yumsen Mate pawh Congress zawm zingah hian a tel.

Thawhlehni-a Rajiv Gandhi Bhawan-a hun hmannaah anni pahnih bakah hian party dang hruaitu panga in Congress hi an zawm bawk a ni. Chung zingah chuan goverment officer hlui Dr C K Gohain, Radham Sindhu leh Noglin Bori-te pawh an tel a ni.

Arunachal Pradesh Congress Committee (APCC) president Takam Sanjoy chuan an party zawm tur mi tam tak an la awm tih sawiin Lok Sabha inthlanah chuan hnehna an chang ngei dawn tih a sawi.

Congress hian People’s Party of Arunachal (PPA) leh Janata Dal (Secular)-te an thawhpui dawn nia sawi a awm bawk.

Hetihlai hian Congress MLA  Markio Tado chuan Thawhṭanni khan BJP a zawm thung. Markio Tado hi Kra Daadi district-a Tali constituency MLA ni lai a ni.

Tado chuan state Congress president Takam Sanjoy hnenah banna thehlutin BJP hi a zawm tih a sawi a, Pema Khandu kaihhruaina hnuaiah an state chuan hma an sawn nasa hle tih a sawi.

State Congress chuan state hmalam hun atan hmathlir an nei lo tih sawiin, hemi vang hian BJP a zawm tih a sawi bawk.

Tada hian 2009 leh 2014 inthlanah khan Congress ticket hmangin hnehna a chang ve ve a, Congress a chhuahsan leh tak si-ah hian seat 60 awmna Arunachal Assembly-ah Congress MLA pali chiah an awm tawh a ni.



Share this Post

Login to comment
No Comments