PM Modi-a'n hmarchhak state pathum a tlawh

Prime Minister Narendra Modi chuan Zirtawpni leh Inrinni khan hmarchhak state pathum- Assam, Arunachal Pradesh leh Tripura-te tlawhin, project eng emaw zat lungphum a phum bakah public rally-ah te thu a sawi.

Assam

CAB-in Assam leh hmarchhak tan harsatna a thlen lo ang : PM   

Prime Minister Narendra Modi hian Zirtawpni chawhnu khan Guwahati thlengin zan a riak a, Inrinni khan Guwahati bula Changsari-a vantlang inkhawmah thu sawiin, sorkar laipui chuan Assam leh hmarchhak hmun hrang hrangin Citizenship Amendment Bill, 2016 vanga harsatna an tawh lohna turin hma an la dawn tih a sawi. Prime Minister hian project ṭhenkhat hawnna a nei nghal bawk.

Hmarchhak hmun hrang hrangah dodalna nasa hle mah se Narendra Modi chuan CAB sawimawi zawngin thu a sawi tho a ni. 

Citizenship (Amendment) Bill 2016 chu Assam leh hmarchhak tan bik a nih loh thu leh rampum tan a nih thu a sawi. Bill chu Pakistan, Afghanistan leh Bangladesh aṭanga rawn lut hnam tlem zawkte tan a nih thu leh inṭhendarh vanga ramdanga awm phah, an nunna ai pawha India la hmangaih rengte tan a nih thu a sawi. India mi tan chuan chung mite pawm chu an tihtur a nih thu a sawi bawk.

Assam leh hmarchhak tan CAB chuan harsatna a thlen dawn lo tih sawiin, bill chuan presecuted minority-te chu khua leh tui nihna an dil a remtihsak dawn lo tih a sawi. Finfiah kher ngai loin khua leh tui nihna chu pek an ni dawn lo a ni, a ti.

PM chuan sorkar chuan Assam leh ramchhung hmun dangah dan loa lut an awm lohna turin hma an la dawn tih sawiin, sorkar chuan National Register of Citizens (NRC) upadate pawh Supreme Court enpuina hnuaiah an kalpui mek zel a ni, a ti. Sorkar hmasa chuan hemi kawngah hian hma an la lo tih a sawi bawk. An sorkar chuan India-Bangladesh border daidanna siamna kawngah chak takin hma an la tih a sawi bawk.

Congress sorkar pawh bei zuiin mitthi tawh pahnih Bhupen Hazarika leh Gopinath Bordoloi-te Bharat Ratna pek tur chu an tikhawtlai tih a sawi a, BJP erawh chuan Assam leilung fate pahnih hnenah chuan tihkhawtlaina awm loin Bharat Ratna an pe a ni, a ti.

Sorkar laipui chuan Assam Accord Clause 6 kalpui tur committee pawh an din tawh thu sawiin, committee chuan an hma chak taka an lak ngei a rin thu a sawi bawk.

Tualchhung chanchinbu-te pawh bei zuiin hmasawnna lam aiin thildang chhuah nasa zawkah a puh. Zinga chanchinbu a chhiar pawhin a beisei ang a hmu lo tih sawiin, a thusawinaah chuan mipui sang tam tak an kalkhawm chungchang chu Guawahati chanchinbute chuan an tarlan a rin loh thu a sawi bawk.

Hmarchhak hmun li-ah public rally a neih thu leh mi tam tak an punkhawm zel thu a sawi a, mahse Assam-a pungkhawm chu an tam ber tih sawiin, hemi chungchang kimchang erawh hi chu Guwahati chanchinbute chuan an tarlang duh dawn lo tih a sawi.

PM chuan Assam state icon - Srimanata Sankardeva, Madhavdeva, Azan Fakir, Chaolung Sukapha, Lachit Barphukan, Gopinath Bordoloi leh Dr Bhupen Hazarika-te zahna thu chu Assamese in a sawi bawk.

Sorkar hmasa chuan heng icon-te hi zahna an lantir lo tih sawiin BJP erawh chuan chawimawina an hlan thu a sawi a ni.

AP: Greenfield Airport lungphum a phum

Prime Minister Narendra Modi chuan Inrinni khan project hrang hrang a hawn bakah porject lungphum eng emaw zat phumna, cheng vaibelchhe 4000 man hu project thawhna tur Arunachal Pradesh state khawpui Itanagar-a hun a hmannah a nei.

PM Modi chuan Hollongi-a greendfield Airport sakna tur lungphum a phum bakah  Lohit district -a Tezu-a retrofitted airport hawnna a nei bawk.

Modi chuan Chief Minister leh state mipuite chu in tinin ‘Saubhagya’ scheme hnuaiah electricity connection an nei tawh chu a lawmpui thu a sawi a, Arunachal Pradesh-in hmasawnna an hmuh chu rampumah pawh a takin hmuh a ni thuai dawn tih a sawi.

PM chuan Greenfield Airport Hollongi ami tur lungphum a phum chu greenfield airport dang ang bawkin, a hunah sak zawh a ni dawn tih a sawi. Tezu Aiport chu kum 50 kal tawha sak tawh ni mah se eng sorkar mahin ramchhung hmundang aṭanga kalpawhna turin hma an la ngai lo tih a sawi a, an sorkar chuan airport zauhna atan hian cheng vaibelchhe 125 an hmang tih a sawi bawk.

Airport, railway line leh rel tam zawk tlantir, highway leh kawngpui bakah electric lama hmasawnnate chu hmarchhak hmasawnna lantirna a nih thu sawiin, Arunachal Pradesh in chak taka hmasawnna an nei chu lawmawm a toh thu a sawi. Chief Minister leh a thawhpuite chu lawmthu a hrilh nghal bawk a ni.

PM chuan Inrinni khan project cheng vaibelchhe 4000 man hu hawnna leh lungphum phumna a nei tih sawiin, project dang cheng vaibelchhe 13,000 man hu vel chu state chhungah kalpui mek a nih thu a sawi bawk.

Tripura: Birbikram Kishore Manikya Bahadur lim hawng

Prime Minister Narendra Modi chuan Assam leh Arunachal Pradesh a tlawh hnuin Inrinni khan Tripura lal hnuhnung ber Birbikram Kishore Manikya Bahadur lim leh railway track km 23 hawnna a nei. PM hi Chief Minister Biplab Kumar Deb leh Deputy CM Jishnu Debbarma-te chuan Maharaja Bir Bikram Airport, Agartala-ah an lo hmuak a ni. 

PM Modi chuan Agartala-a thu a sawinaah New Delhi-a an sorkar chuan rilru dik tak puin hna an thawk tih a sawi a, eptu party-te chu mipuiten zirlai an zirtir dawn tih a sawi. Epty party-te chuan inthurualin an sorkar chu sawisel in, Delhi-ah sorkar  chak lo tak din an tum tih a sawi a, an sorkar chak tak chu an ngaimawh niin a sawi. 

PM chuan a kaihhruai sorkar chuan mi rethei, loneitute leh middle class-te chawisan chu a tum a nih thu sawiin, sorkar laipui scheme- PM Kisan, Ayushman Bharat, Ujjwala Yojana leh LPG connection chungchangte pawh a sawilang a ni. 

Tripura chuan hmasawnna nasa tak a hmuh thu sawiin, BJP sorkar hnuaiah chuan South East Asia gateway-ah siam a nih tawh thu a sawi.

CAB duh lohna lantir nasa

Citizenship Amendment Bill, 2016 duh lohna lantir nasat lai takin Prime Minister Narendra Modi chuan hmarchhak a tlawh a, mipuite chuan flag duh nen lo hmuakin CAB duh lohna thute an lo auchhuahpui a ni.

PM Modi hian Zirtawpni khan Guwahati airport thlengin, Assam finance minister Himanta Biswa Sarma leh official pawimawhte chuan an lo hmuak. Guwahati aṭanga Raj Bhavan a panna kawngah hian All Assam Students’ Union (AASU)-te chuan flag dum nen lo hmuakin, CAB duh lohna an lantir. Samujjal Bhattacharya, AASU advisor chuan BJP chu anti-Assamese an nih thu leh CAB chu ram leilung fate tana harsatna thlentu an nih thu a sawi. 

Asom Gana Parishad (AGP)-te pawhin torchlight protest neiin, PM tlanna kawng aṭanga hla vak loah CAB duh lohna an lantir ve bawk a, heng pawl pahnihte hian PM-in a tlawh denchhen hian Rajya Sabha-a CAB pawm tum duh lohna an lantirna a ni.

Inrinni pawh khan Asom Jatiyatabadi Yuva Chhatra Parishad (AJYCP)-te pawhin Machkhowa area-ah flag dum hi an lo hmuh bawk a, Jalukbari area-a Gauhati University an tlanpelh lai pawhin zirlai ṭhenkhat chuan flag dum an lo hmuh bawk.

Adabari leh Fancy Bazar area-ahte pawh Krishak Mukti Sangram Samiti (KMSS) leh AJYCP-te chuan flag dum an lo hmuh ve leh bawk a ni. Krishak Mukti Sangram Samiti (KMSS) activist pakhat phei chuan CAB duh lohna lantir nan ruakin PM Modi hi lo a lo hmuak a ni.



Share this Post

Login to comment
No Comments