Tripura: IPFT-ten Tribal state hran leh NRC ngiat

Tripura-a sorkarna siamtu zinga mi Indigenous People’s Front of Tripura (IPFT) chuan nimin khan nawrh huaihawt ṭanin hunrei tak  an lo ngiat tawh Tribal state hran ngiatin nawrh an huaihawt. 

Nawrh huaihawt hian Tripura Tribal Areas Autonomous District Council (TTAADC)-ah darkar 12 chhung bandh an huaihawt a ni.

December 11 aṭang hian Delhi-ah sit-in demonstration huaihawt an tum bakah Prime Minister Narendra Modi leh Home Minister Rajnath Singh-te hnenah memorandum thehluh an tum bawk.

IPFT thupuangtu leh Assistant General Secretary ni bawk Mangal Debbarma chuan IPFT leh an thawhpui pawl pasarih te chuan nawrh hi an huaihawt thu a sawi.

Tribal state hran an ngiat mai bakah hian National Register of Citizens (NRC) state chhunga kalpui ve an ngiat bawk a, Citizenship (Amendment) Bill, 2016 hnuhdawh leh TTAADC area-a inner-line permit hman ve an ngiat bawk a ni. Heng bakah hian Kokborok ṭawng 8th Schedule of the Constitution-a telh ve an ngiat tel bawk.

IPFT hian 2009 aṭang tawh khan state hrang hi an lo ngiat tawh a, TTAADC chu state hrana siam an lo ngiat fo tawh a ni. TTAADC hian state chhung hmun thuma ṭhena hmun hnih dawn a awh a, 10,491 sqkm area niin mi 12,16,000 vel an cheng a ni.

Tunah hian Tripura ministry-ah hian IPFT minister pahnih awmin Revenue Minister Narendra Chandra Debbarma (IPFT President) leh Tribal Welfare and Forest Minister Mevar Kumar Jamatia (General Secretary)-te  chu IPFT aṭanga Minister awm te an ni.

IPFT-te thil ngiat ang deuh chiah ngiat hian Indigenous Nationalist Party of Tripura (INPT)-te pawhin December 10 aṭang hian kawngpui leh rel kawng dan an tum ve bawk.

Hetihlai hian IPFT in state hran an ngiat hi sorkara an thawhpui BJP, eptu pawl Congress leh Congress and Communist Party of India-Marxist-te chuan an dodal thung.



Share this Post

Login to comment
No Comments