Manipur CM in mipuite chiai lo turin ngen

Manipur state hmun ṭhenkhatah thla hnih chhung vel chu mak tak taka ran vulh lai an thih avangin Manipur mipuite chu an chiai hle a, hemi anih avang hian Chief Minister N. Biren Singh chuan mipuite chu chiai lo turin a ngen.

Mi ṭhenkhat chuan ramsa mak tak, fing tak, thla neiin an ran vulh lai te chu a rawn eisak ṭhin niin an sawi a, an sawidan erawh a inang lo hle. He thil thleng vang hian hmun ṭhenkhatah phei chuan zanah pawh pawn an chhuak ṭha ngam lo a ni.

Mipuite chu a huho-a chhuakin ramsa mak tak nia an sawi chu an veh ṭhin a, engnge a nih chiah an la hre thei lo a ni.

Chief Minister Biren Singh chuan mipuite chu chiai lo tura ngen in Wildlife Institute of India (WII)-a mithiam bik te chu thil awmdan chhuichiang turin an state-ah an rawn luh tawh thu a sawi a, hmun hrang hrangah CCTV an dah belh bawk thu sawiin  eng thilin nge an ran vulh te tihlum ṭhin tih chu hriat an tum tih a sawi.

State Police Department-te pawh thu dik lo lengvak tur laka hma la tura hriattir an nih tawh thu a sawi bawk a ni.



Share this Post

Login to comment
No Comments