AP sorkar leh ESG in MoU ziak

Arunachal Pradesh sorkar leh Entertainment Society of Goa (ESG) chuan ‘International Tribal Film Festival’ buatsaih turin Thawhṭanni khan Memorandum of Understanding an ziak.

Arunachal Pradesh Information & Public Relations department leh ESG ten MoU an ziahnaah hian Chief Minister Pema Khandu pawh a tel a, CM chuan inremna an ziah chu an state economy tiṭha tur leh ṭhalaite tana hna siambelh tur a nih a beisei thu a sawi.

Pema Khandu chuan ramchhung hmun hrang hranga film leh media mite mai bakah khawvel hmun danga mi ten festival denchhena an state an tlawh chuan economy-ah hmasawnna a thlen ngei a beisei thu a sawi a, chung film siamtu te chuan an state-a film te an shoot chuan an ṭhalaite leh artiste-teah chona thar a tuh ngei a rin thu a sawi bawk.

‘International Tribal Film Festival’ hi nakkum January vela neih tura ruahman a ni a, ni thum chhung a awh ang.

Hemi bakah hian Arunachal Pradesh sorkar leh Oil India Limited (OIL)-te chuan Namsai leh Changlang district-a Ningru block tan Petroleum Mining Lease Deed Agreement Thawhṭanni vek khan an ziak ve bawk.

Sorkar laipui chuan Ningru tan hian OIL Petroleum Mining Lease a lo phalsak tawh a, 1983 daih tawh khan kum 20 chhung atan a lo phalsak tawh a ni. Company hian oil khur 14 Ningru-a  Kumchai area-ah an verh tawh a, mahse heng zinga pakhat chiahah hian crude oil an verhchhuak a ni.

Mahse sorkar phalna hi 2003 khan a tawp tawh a, forest clearance leh thil hrang hrang vangin rei tak chhunzawm theih a nih loh hnuah Thawhṭanni khan OIL nen hian inremna hi an ziak leh thei ta a ni. 



Share this Post

Login to comment
No Comments