Assam: Tualthah thubuaiah Union Minister leh Political leader 5 lakah complaint lut

Assam-a Tinsukia-a kar liamta Ningani zana Bengali mi panga thah an nih thubuai kalzelah Police-te chuan Union Minister Rajen Gohain leh political leader panga lakah Thawhṭanni khan complaint thehluh a nih thu an sawi.

Police-te chuan Silchar Sadar police station-ah complaint hi lutin Ex-ULFA United Platform general secretary Inamul Haque Laskar chuan complaint hi a thehlut tih an sawi. Tinsukia tualthahna chungchanga a thusawi avangin Union Minister lakah hian complaint hi thehluh a nih thu an sawi bawk.

Minister of State for Railways Rajen Gohain bakah hian political leader panga - BJP MLA Shiladitya Dev, party leader Pradeep Dutta Rai, Congress MP Sushmita Dev, party MLA Kamalakhya Dey Purkayastha leh Chandan Sarkar te lakah pawh complaint hi thehluh a ni.

Heng politcial party hruaitute lakah hi chuan an thusawi  vanga complaint an ni lo thung a, mahse Tinsukia inthahna kaihhnawihah hian thu inhnial thei tak tak an lo chhakchhuak fo tawh nia puh an ni ve bawk.

Kar liamta Ningani zan khan Tinsukia-a Kheronibari thingtlang khaw bula lei bulah hel ni ngeiin an hruai chhuah mi panga ruang chu hmuh a ni a, heng ruang te hi kahhlum an nih thu police te chuan an lo sawi tawh a ni.

Hemi chungchangah hian thu lengvak a tam hle a, bandh te pawh huaihawt lo ni tawhin Assam Chief Minister Sarbananda Sonowal leh Union Home Minister Rajnath Singh te pawhin pawikhawihtute chu an dem thu sawiin zawn chhuaha hrem an nih ngei tur thu an lo sawi tawh nghe nghe.

He thubuai kalzelah hian Zirtawpni liamtaah khan United Liberation Front of Assam (ULFA) hel pawl mi pahnih chu man an lo ni tawh bawk a ni.



Share this Post

Login to comment
No Comments