Bangladesh-a ruk bo thla thum hnuah hruaikir

Meghalaya-a West Garo Hills district-a pa pakhat kum 67 mi chu Bangladesh misual ten thla thum liamta khan an ru bo a, mahse India thuneitute kutah amah bakah midang pahnih nen hlan let leh an ni tih Nilaini khan tarlan a ni.

Police-te chuan Dawki-ah heng mi pathumte hi Thawhlehni tlaiah khan state police kutah hlan an nih thu an sawi.

Meghalaya mi hi  Phalgun Arengh a ni a, a chenna hmun Hatimara aṭangin May 23 khan Bangladesh misual te hian an ru bo niin official te chuan an sawi a, a rubo tute hian cheng buai 50 an phut a ni.

Mahse Phalgun Arengh chuan amah mantute hi an muthilh laiin a tlanchhuak niin a sawi a, Bangladesh Sherpur district-a a chhungte inah a kal ta niin a sawi.

Hemi hnu hian Bangladesh police-te kutah hlan niin jail-ah dah a nih thu state police official te chuan an sawi.

Police-te chuan Chief Minister Conrad K. Sangma leh state thuneitute hmalakna avangin hruaikir leh theih a ni ta niin an sawi a ni. Arengh bakah hian kum 56 mi, Garango Das leh S Acharjee, East Khasi Hills-a Bholaganj thingtlang khaw mi te pawh Meghalaya police-te kutah hian hlan ve nghal an ni bawk.

Das hi Bangladesh jail-ah kum 14 a tang tawh a, March 11, 2004 khan sangha lei tura dan loa Bangladesh-a a lut chu man a ni. Acharjee pawh hi dan loa Bangladesh-a a luh avangin 2010 khan man a ni.



Share this Post

Login to comment
No Comments