Manipur hmeichhia ten a huho in Minister ina luh tum

United Committee Manipur hnuaia hmeichhe pawl Aapunba Manipur Kanba Ima Lup-te chuan Thawhlehni khan Assembly session-a Naga Framework Agreement chungchang sawi phutin Deputy chief minister, Y. Joykumar, MAHUD minister Th. Shyamkumar leh works minister Th. Bishwajit-te chenna inah luh an tum.

Heng hmeichhe kalkhawm te hi police-te chuan lo dangin hmeichhe ṭhenkhat erawh chu memorandum thehlut tura Minister-te inah hian luh an phalsak. 

UCM hmeichhe ṭhenkhat hi Minister-te inah hian lut mah se minister-te hi an inah an lo awm lo nia tarlan a ni.

Memorandum an thehluhah hian Naga Framework Agreement chungchang monsoon session neihah sawichhuah a ni lo chu an dem thu an ziak a, House chu Union Home Minister Naga Framework Agreement chungchanga zawhna awm te chhang tura nawr turin an phut tih an ziak bawk.

Aapunba Manipur Kanba Ima Lup (AMKIL) president, Ph. Sakhi chuan framework agreement chuan engmah buaina a thlen dawn lo a nih chuan engvanga puangzar mai lo nge an ni tih zawtin state chhunga Naga-te special status pek tum pawh chu state mipuite an pawm thei lo tih a sawi.

Sakhi chuan sorkar laipuiin mipuite duhdan a ngaihsak lo chu thil awihawm loh zawk tak a nih thu a sawi bawk a ni.

An thil phut tihhlawhtlin a nih theih nan chuan an theihtawp an chhuah zel dawn thu sawi bawkin, eng tiang pawha hmalak an inhuam thu an sawi bawk.



Share this Post

Login to comment
No Comments