NSF-ten NRC vanga Nagaland-a luh tum te check thut dawn

Nagaland-a zirlai pawl Naga Students’ Federation (NSF) chuan Thawhlehni khan thuchhuah siamin Assam NRC list-a tel loh vanga an state chhung lut an awm leh awm loh bakah state chhunga luh tumte hriatchhuah an nih theih nan surprise check an neih dawn thu an sawi.

Zirlai pawl chuan state chhung hmun hrang hrangah document enfiah tur an indah dawn thu an sawi a, state chhung lut tur reng reng chuan inner-line permit (ILP) leh document pawimawh dang bakah Aadhaar card te pawh an hmuh zel a ngai dawn tih an sawi bawk.

Heng lehkha pawimawh nei lo te chu dan loa state chhunga luh tumah an ngaih dawn thu an sawi bawk a, heng mite hi chu district thuneitute leh police-te kutah an hlan zel dawn tih an sawi a ni.

NSF chuan hma an lak hunah district thuneitute leh dan lam lekkawhtute chu ṭha taka thawhpui turin an ngen a, mipuite thawhpuina pawh an ngen bawk. 

Assam hian July 30 khan NRC draft list an tichhuak a, mi nuai 40 chuang list-a an tel loh avang hian  Assam ṭhenawm state te chu an fimkhur hle a, an state chhunga dan loa a ruka pem lut an awm lohna turin theih tawpin hma an la hlawm a ni.



Share this Post

Login to comment
No Comments