NEC 67th Plenary Session Shillong-ah neih a ni Union Home Minister in hmarchhak state te NEC project kalpui turin ti

North Eastern Council Plenary Session vawi 67-na chu State Convention Centre, Shillong-ah Thawhṭanni aṭang khan neih ṭan niin he meeting hi Union Home Minister leh NEC Chairman ni bawk Rajnath Singh chuan a kaihruai a ni.

Plenary Session-ah hian hmarchhak state pariat aṭangin Governor-te leh Chief Minister te an fuankhawm a, anni bakah hian sorkar official pawimawh tak tak te telin, hmarchhak hmasawnna tur kawng hrang hrang an sawi ho. 

Meeting-ah hian hmarchhak development project hrang hrang sawiho a ni a, NER project hrang hrang te pawh review meeting neih a ni bawk. NEC in project a kalpuite thlir ho leh hma lak zel dan turte pawh ngaihtuah ho a ni bawk.

Livelihood programme, water resource management, afforestation bakah 2022-a loneitute pawisa lakluh a leta tihpun chungchang te, kawngpui siam chungchang te sawiho a nih bakah Poshan Abhiyan leh Ayushman Bharat scheme kalpui a nih dan tur te pawh sawiho a ni bawk a ni.

Hmarchhaka venhimna kalpui dan chungchang pawh sawilan a ni. Meeting-ah hian a hmasa ber atan venhimna chungchang hi sawilan a ni a, Armed-Forces(Special Poers) Act bakah Naga accord chungchang te pawh sawilan a ni bawk.

Rajnath Singh-a thukhawchang

NEC 67th Plenary Session hi Union Home Minister Rajnath Singh-an Planery session a telpui vawikhatna a ni a, meeting-ah hian chairman a ni nghal bawk a ni.

Union Home Minister chuan hmarchhak state pariat-a project hrang hrang kalpui mek chu a hun taka zawh hman a nih theih nana hma la turin state hruaitu kalkhawmte chu a hrilh.

Home Minister chuan state hrang hrang chu sorkar laipuiin cheng vaibelchhe 4,500 hmarchhak hmasawnna atana a pawm thar chu hlawkthlak taka hmang tura chahin hmasawnna thlenna tur hmun bik thlang turin a ti a, sorkar scheme te chu chak zawka kalpui turin a ti bawk.

Hmasawnna tura civil society te pawimawh thu sawiin, project kalpui te chu social audit a pawimawh thu a sawi a, project chak taka kalpuina tur chuan tunlai technology-te pawh hmang thiam turin a ti a ni. Civil society-te chu socio-economic change thlenna tura thawhpui thiam an pawimawh thu a sawi bawk a ni.

Social audit pawimawhna sawiin sum hman dan mai piah lamah mipuite chu hmasawnna kawnga thawhnaah a inhnamhnawih tir thei a, chu chu hmasawnna turin a pawimawh hle a ni, a ti.

Hmarchhak area-a hamsawnna thlen tur chuan short-term, medium-term leh long-term roadmap siam a pawimawh thu a sawi bawk.

DoNER Ministry chungchang pawh sawichhuakin North Eastern Development Finance Corporation Limited (NEDFi) kaltlangin DoNER chuan North East Venture Capital Fund chu tun hnaiah an tlangzarh thu a sawi. Capital Fund hi Tourism, waste management, medical healthcare, handloom leh handicraft bakah agro product lama hmasawnna atana hmang turin a chah bawk a ni.

Union Minister chuan Union Cabinet in March, 2018 khan  North East Industrial Development Scheme (NEIDS), 2017 a pawmpui tawh thu sawiin, kum 2020 March thla thlenga senso tur chu cheng vaibelchhe 3,000 a nih thu a sawi.

Look East policy chu Act East policy-a thlak a nih tawh thu sawiin hmarchhak state zawng zawngah chuan hmasawnna nasa tak thlentir an tum thu a sawi a ni.

Hmarchhakah helna 85% in a tlahniam

Union Home Minister Rajnath Singh chuan NDA sorkar in kum li chhung sorkarna a chan hnuah hmarchhakah venhimna lamah hmasawnna nasa tak a awm thu a sawi. Kum 1990 chho nena khaikhin chuan helna pawh 85% laiin a tlahniam niin a sawi bawk.

Rajnath Singh chuan tunah chuan Tripura leh Mizoram-ah helna a awm tawh loh thu a sawi a, hmundangah pawh helna a tlakhniam zel thu a sawi. Helna a tlakhniam avang leh venhimna kawnga hmasawnna a awm avangin Meghalaya-ah chuan AFSPA hlih vek a nih tawh thu a sawi a, Arunachal Pradesh-ah pawh hmun tlemteah chiah hman a nih tawh thu a sawi a ni.

State hruaitu ten eng nge an sawi?

Plenary Session-ah hian Assam, Nagaland, Manipur, Sikkim, Mizoram, Meghalaya, leh Arunachal Pradesh Governor-te chuan thu an sawi a, Meghalaya, Assam, Tripura, Arunachal Pradesh, Mizoram leh Nagaland Chief Minister-te pawhin thu an sawi bawk. 

Nagaland Governor PB Acharya chuan Nagaland-a issue hrang hrang a sawichhuak a, hmarchhakah chuan natural resource mai bakah human resource pawh a tam thu sawiin, mahse heng theihna hmarchhakin a neih te hi a nihna tur ang taka hmanchhuah a la ni lo a ni, a ti. 

Meghalaya Chief Minister Corad K. Sangma chuan NEC tana fund dah chu ennawn leh a ṭul thu sawiin cheng vaibelchhe 2000-a pun turin a ti.

Sangma chuan hemi hmang hian hmasawnna project chu thawh a sawt lehzual dawn niin a sawi.

Conrad Sangma chuan Meghalaya chuan hmarchhak state dang ang bawkin hmasawnna tur tam tak a la neih thu sawiin chona tam tak a la hmachhawn mek niin a sawi bawk. 

Assam Chief Minister Sarbanada Sonowal chuan hmarchhak chu hunrei tak chhung dinhmun hniam taka a awm thu sawiin theihna tam tak nei mah se hma a sawn lo hle tih a sawi a, mahse Prime Minister Narendra Modi hmathlir vangin hmarchhak chu "‘New Engine’ of India’s growth" a nih tawh thu a sawi.

Act East Policy sorkarin a kalpui chu hmarchhak in kawng hrang hranga hmasawnna a neihna atana ke penna pawimawh tak a ni, a ti bawk.

Sonowal chuan DoNER Ministry chu kawngpui siam, tuikawng siam, airway leh telecom project-te South East Asia nena inkalpawhna atana kalpui turin a ngen bawk a ni.

North Eastern Council hi North Eastern Region (NER)-a economic leh social development awmna atana agency pawimawh ber a ni a, hmarchhak state pariat te chu hemi hnuaiah hian an awm vek a ni.  North Eastern Council (NEC) Act, 1971 hnuaiah 1971 khan din a ni a, thla hmasa lawk aṭang khan NEC Chiarman atan hian Union Home Minister chu ruat thar a ni nghe nghe.



Share this Post

Login to comment
No Comments